Intartaratu da l’aziminu un caldaru (1) marinarescu, salutò à Zia Pignatta chì si ne pusava à u frescu.
– O Pignà… à u frescu ? Hè cotta cotta a pruvenda ?
– À u frescu, o Caldà… ci n’hè bisognu : m’aghju compiu una pulenda.
– Sta cagnara ùn pò durà… sempre à u focu, musgingati, catapughjati è mai cambià di locu. Tanti paesi, mancu tù l’avarè visti… Vulemu parte ancu noi à fà i turisti ?
– O Caldà, senza parlà di e spese, a me salute ùn mi parmette di st’intraprese.
– E spese ? Pumate cù u sale, è pane à mogliu… D’altronde, sai quantu bè ti vogliu, mi mittaraghju trà tè è u scogliu.
A pignatta, laziosa di fassi duie mosse, accittò assicurata ch’ella fù contru à e scosse.
Un pocu saltichjendu un pocu à buchera, di fà caminu era a sola manera.
– O Caldà, si no avìamu aspittatu a fin’di a staghjone, pare chì i Ponti è Argi rifaranu u stradone.
– A sò. L’ingeniere u prugettu l’hà da trè generazione
– Umbeh… ci vole à calculà, è ci hè di chè… Par sbrumà a pitrucella hè quistion’di matemàtiche.
– Aghju capitu… è sì un’equazione hè falsa par i trottoirs ùn ci hè più piazza…
Tuttu fendu a so chjachjarata, èranu ghjunti in San Bastianu è piglionu a falata, ma allora, o… si falava à miccànica mullata… daretu à una girata ci era una bruetta, sposta à meza strada, chì l’avarìa detta…
A pignatta investe (2), mena, salta, ribomba è ricasca, face duie bucate, si stracqua è si spacca.
– Saetta, chì pignattata. L’affari sò in daveru. Avìu tutu privistu, for’di u Cantunere.
Muralità
Fin chì par mette in pràtica e matemàtiche di l’ingenieri,
Ùn avemu cà bruette di Cantuneri,
Cari amichi Corsi, ci hè da avè i pinseri. •
- Caldaru : paghjolu.
- Investe : cifrà, fragà.
