Eccu un cantu ch’hà viculatu parechje generazioni bastiaccie. Unu di i più belli canti di Corsica da a so ochjata ver di un passatu di tradizioni è di vita bastiaccia. Hè statu scrittu da l’autore cumpunitore Eugène Martin Anarella (1917-1980), cunnisciutu per tante canzone celebre, da u Campanile di San’Ghjuvà à a Falata di Ficaghjola, Serenata à tè Maria, Amicu Mulatteru… Figliolu di u Mercà, Eugeniu Anarella ci hà lacatu un veru tesoru di cultura, ch’hè statu ripigliatu da Carlu Rocchi, po da tanti canterini dapoi.
E so òpere sò un magnìficu umagiu à a cità di Bastia !
Venendu di a Terra Nova per carrughju Sumerà
Carrughju Drittu, u Guadellu
Cù u mio spurtellu
Mi ne scendu à u Mercà
Tuttu hè di tende, si vede
Fiori, panere di mimosà
Si spechja nant’à u mare
Cum’ellu hè bellu u campanile di San Ghjuvà.
Mùghjanu e vinderole
O quanta ghjente ch’ùn si pò passà
Vi chjàmanu e pisciaghje
O signore, venite à cumprà
Sardelle vive, si sente trumbetta
Di l’acqua di Monserrà
Sott’à u campanile di San Ghjuvà.
I campanili di Pasqua,
Da Portu novu à San Ghjisè
È tutte quelle cantine
Di canistrò sin’à u mercà di pè
In le strette sò le chjocche,
Ci ghjòcanu à baiocche nant’à u mercà
Di ghjugnu, vicin’à u mare,
Hè più grande u fucarè di San Ghjuvà.
A sera à u chjar’di luna
O quella dò* vedite affacà,
Ghitarra è mandulina
Un serinatu pudete ascultà
O quanta allegria, Bastia canta è sona,
Ancu u Libecciu fischjerà,
Sopr’à u campanile di San Ghjuvà. •
* dò = donna
