U gallu rossu di ziu Battista s’era appullatu annant’à un accassià. In pulpitru era cullatu par ghjittà un colpu d’ochju in lu luntanu.
À un chjosu sott’à a ripa, chì hè postu à granu. Tutti l’anni u pullinaghju sanu, virità detta in duie righe, andava in quellu chjosu in ispidizione è stirpava le spiche, era un sistema chì ziu Battista l’avìa amparatu, cusì, ellu, di u magnà di e galline era spinsiratu…
È ùn timìa nulla in nisuna manera chì Guardia Campestra era un pezzu ch’ellu ùn ci n’era…
Ma sta prucissione annuale, ùn partìa cà à colpu sicuru…
Avete induvinatu chì u gallu, da l’accassià, guardava s’ellu era maturu.
Mà sì u galllu guardava u granu, a vulpaccia, ella, vidìa u gallu da luntanu :
– Uuuuh !… un gallu rossu. Sì chì ci hè di megliu pà u spuntinu. Curremu à parlalli da vicinu…
– Salute, gallu rossu ! Sò felice di fatti sapè, è ancu ti farà piacè, chì l’animali di u mondu intieru anu fattu amicizia, è dipoi sta mane hè signata l’armistizia ! Par ditti ch’ella hè vera, vinendu aghju scontru un gattinu chì si ne ghjucava incù un tupulinu…
– O Vulpò… ziu Battista à a Radio, hà pigliatu l’infurmazione avanti di sente à Francescu Culumbani è Linzulone1… Ciò ch’è tù dici mi pare una brulla : u postu di sta pace ùn hà dettu nulla…
– U postu ? L’omi anu di i guai à sbruglià i soi l’affari, s’occuparanu ancu di quelli di l’animali !…
– S’è capiscu bè, i gatti sò incaricati d’annunzialla à e tupuline, è le volpe spizialmente à e galline ?
Da quì, o Volpe, tirgu a cunclusione chì u cane chì vene currendu, s’occuparà di e vulpone… È aghju l’imprissione chì u basgiu di stu cagnulinu sarà cum’è quellu di u gattu à u tupulinu…
Ùn sò mancu sì a volpe hà intesu u restu, talmente fù prissata di scappà prestu prestu…
Muralità
In sta pace chì l’ONU ci prumete vicina,
A Francia chì sarà ? Topu o Gallina
Prichemu u Signore, è sì e prighere sò intese,
Ch’ellu mandi un accassià à u gallu francese… •
- Francescu Culumbani è Linzulone : ghjurnalisti chì facìanu un emissione in lingua corsa à nant’à l’onde di Radiu Monte Carlu in lu sissanta.
