U Duce Lione era aggrancatu da i dulori…
Hè par què ch’intornu à ellu, ci era tanti duttori.
– Tension, disse u primu. Cholesterollu, disse u secondu…
– Sciàtica, disse u spezialistu. Almenu ch’ellu ùn sìa muribondu.
– Apremu e trippe, assicurò Comiti1… è pò… vidaremu… Sempre à tempu à ricosge saremu…
Ogni Mèdicu l’avìa vistu, prese a parolla u Dintistu.
– Par chì Lione ritrovi a forza di u toru, li ci vole trè o quattru bridsgi2 in oru… Dece curonne, par mastucà è ch’ellu a si franchi, trà tuttu, una spesa di nove centu milla franchi…
– Signor’Lione, dichjarò u lupu, ci hè un pezzu ch’è a v’aghju detta : duvarìate fà un pocu di bissicletta… Ognunu hà datu a so midicina, ma ùn vecu in locu a furdana Vulpina…
– Ella, gridò Lione, ùn face cà dì què i colpi… Currite sùbitu… ad affumaticalla cum’è i polpi…
Una meza ora dopu, inquatrata da l’inviati, face a so intrata a Volpe, l’ochji sciuticati. U sguardu ch’ella lampò à u lupu impauritu, fece cumprende à quellu chì a Volpe avìa capitu :
– Imperatore…. Èranu tutti intornu à Voi, for’di Vulpina… A quale s’hè tirata à pedi à Notre-Dame de Lavasina. Sapendu chì à la Madonna una prichera pìa, vi francarìa morte è malatìa. Par Voi, Maestà, aghju tantu pricatu, chì à la fine a Santa Madonna m’hà parlatu…
– Miràculi sacrati… T’hà datu u rimediu ?
– Signor’ sì m’hà datu ancu megliu :
« Scurticatus est Lupus presto subitus
È pella calda sposta Lionis spinus…
Caloris pellibus operandi miraculum
Lionis guaritus in ipse mumentum… »
Si fece più presto à spillà quellu lupone, cà Charles Pieri3 una capra ch’ellu vende par muntone !
Muralità
Par cunnosce a natura di i vostri dulori, chjamate parechji duttori…
Par esse più sicuru di finisce à u spidale,
Mittìtevi à collu l’Allucazione familiale,
Ma sì vo cascate in manu à u Dintistu,
Arricummandàtevi dirritamente à Ghjesù Cristu. •
- Comiti : chirurgicu è patrone di a clìnica di u listessu nome.
- Bridsgi : protesi dintaria, parolla inglese (bridge : ponte) aduprata da i dintisti.
- Charles Pieri : macillaru aiaccinu.
