Nanzu si chjamàvanu e nostre sucietà dette civilizate, « u mondu lìberu ». Si parlava cusì di i Stati Uniti è i so alleati, dopu à a seconda guerra mundiale è u trionfu di a demucrazìa è di l’ideali di libertà nant’à u nazìsimu è u fascìsimu. Di fatti, dàvanu di pettu à i regimi tutalitarii è si punìanu cum’è salvatori di l’umanità. Puru èranu imperialìsimi anch’elli. Ch’ellu sìa culunialìsimi, per gendarmà u mondu, è sopratuttu i paesi detti sottusviluppati, in Àfrica o in altrò, da viutali di e so richezze minarie o energètiche. Quantu si n’hè scrasatu paesi è pòpuli à nome di a libertà ? È cusì s’hè spenta pocu à pocu l’edea di un mondu lìberu. È cù ellu l’ideali demucràtichi sò diventati sonnii alluntanati è anu nutriti di più bellu l’imperialìsimi. A « guerra fredda » cù l’Unione Soviètica hà rinculatu e so fruntiere à l’Amèrica è à i so alleati aurupei. Un aria di libertà hà suffiatu un tempu, qualchi annata dopu, quand’ellu s’hè struttu u muru di Berlinu sparghjendu un ventu di libertà in Russìa… ma in fùria fùria s’hè affucatu. L’affaccata d’un novu imperialìsimu cù Poutine, forse più pèssimu o più furdanu chì quellu sovièticu, ùn hà micca lasciatu à a sucieta rùssia u tempu di spannassi è i corci ucrainiani ne pàcanu u prezzu oghje. In fatti, u mondu hè sempre in mutazione cuntìnua, è piuttostu in u gattivu sensu. Malgratu mondu mare è maraviglia di prugressi tecnulògichi, ùn ghjunghje à sbuccà nant’à a nova civilisazione tantu bramata chì si vulerà più lìbera è appaciata, è sopratuttu più umana.
Oghje ghjè l’Amèrica chì vene in crisa. Hè bastata l’affaccata d’un scemu ancu quì per vede sfundassi e certezze è e custruzzioni chì parìanu sin’à quì immutate. Trump hà riesciutu hà strughje in pocu tempu tutti i riferimenti di l’òrdine mundiale tale è quale omu u cunniscìa sin’à avà. L’Otan, l’Organisazione di e Nazioni Unite, l’Organisazione mundiale di u Cumerciu, u G7, u G20 è tutti quanti… più nunda ùn vole dì qualcosa oghje. Più nisun custruzzione, più nisun règule internaziunale, pàrenu rispettate è avè un sensu. Tuttu hè foscu, malcertu, capriciosu, secondu l’estri di u capizzone di a prima putenza mundiale chì face capisce à quale u vole sente, ch’ellu hè ellu chì cummanda. E règule sò sregulate, l’ordine hè disurdunatu, i valori sò disprezzate è ùn si sà più a diferenza trà a verità è i fake news. Ghjè u regnu di l’orgogliu, u bugiardìsimu, l’inghjustizia, a gattivera, u dispettu, i culpacci. Rinvivìscenu è sbùccianu più chè mai l’imperialìsimi nant’à e brame di libertà è di dignità di i pòpuli. Induve ci pòrtanu sti venti quì ? Da l’Este à l’Ueste, da l’Oriente à Punente, minàccianu e guerre mundiale è a vechja Auropa ùn ghjunghje à fà paura abbastanza da fà rispettà i valori di ghjustizia è di sulidarità. Si perde anch’ella in e so pròpie derive, si fràzanu i so valori è si fracicheghja u so ideale demucràticu da a crèscita di l’estremì. L’odiu suprana tuttu. Omu ùn si sà più induve truvà brama è speranza. Forse u mondu hà bisognu di sfundassi in vera nanzu di ritruvà un pocu di sumerinu ? Chì fà in stu cumbugliu da ch’ellu vince u bè nant’à u male ? Tene a lumeruccia incesa di l’umanità. Ancu puru à traversu i venti cuntrarii di i timpurali, riesce à mantene i valori di bè cumunu, di sulidarità è sempliciamente d’amore è di spartera. Nè rompe nè piegassi. Tene arrittu in a timpesta. •
