Scola Corsa hè leatu à u retale Eskolim è prufitta di a so sperienza. Cusì, cum’è per tutte e filiere d’insignamentu immersivu assuciativu, à u latu di l’associu « maestru », sò creati associ « lucali », da pudè amministrà e scole soprapiazza, assucià i parenti à a vita sculare di a so figliola o u so figliolu, impegnali ind’è l’animazione culturale di e scole, risponde à i bisogni di e maestre per ciò chì cuncerna materiale o bisogni per intratene e scole è rende i lucali operaziunali. In u filu di Scola Corsa, sò stati creati per ogni situ di scola, un associu cù i parenti è i militenti chì vòlenu partecipà à a marchja di a so scola. Scola Corsa di Biguglia hè statu creatu u 27 di ferraghju 2021, è Scola Corsa di Bastia, u 27 di marzu 2021.
Alinu Gherardi hè u primu presidente di Scola Corsa di Biguglia, è Pasquale Castellani hè u primu presidente di Scola Corsa di Bastia. Ogni associu hà un scagnu è un Cunsigliu d’Amministrazione induv’elli s’impègnanu parenti è militenti cù l’aiutu, ancu assai impurtante, di e merrìe ch’accòglienu a scola in i so lucali. Ci hè cusì una cunvenzione trà l’associu lucale è a merrìa da pudè urganizà i servizii ch’abbisogna a scola. Sò dinù un mezu pè i parenti d’impegnassi à u latu di i so zitelli, di fà lea trà i parenti è di sèntesi parte sana di l’avventura.
L’associi lucali sò dunque i pilastri di a vita di a scola è u so rollu d’animazione hè fundimentale. Arritti dà a parulla à ss’attori principali è i feliciteghja pè u s’impegnu precursore ind’è a messa in ballu di sta filiere assuciativa d’insignamentu immersivu à prò di a nostra lingua. •
