U Scopaff hè un cumitatu tècnicu di l’Unione aurupea chì travaglia nant’à i vegetali, l’animali, l’alimentazione… tuttu ciò chì cuncerna ciò chè no truvemu ind’i nostri piatti (Standing Committee on Plants Animals Food and Feed). Vale à dì l’impurtanza di st’arnese chì indita è cuntrolla e misure prese da l’Unione aurupea pè a securità di l’alimentazione è di e sumente, a salute di l’animali, o di e piante. S’impegna à a surveglianza di l’urganìsimi geneticamente mudificati (OGM), i prudutti fittosanitarii, a securità di a catena alimentària eccèttera. Ma in realità hè una struttura più pulìtica chè scientìfica, postu ch’ella hè cumposta da raprisententi di i Stati membri chì cùranu u so interessu anzituttu. È face un pezzu ch’ellu conta, postu ch’ellu hè statu creatu in u 1966 ! Hà un rolu impurtantìssimu per un dettu ind’è l’autorisazione di i pesticìdii è si trova in core à e decisioni di i regulamenti di a pulìtica agrìcula è di tuttu ciò chì cuncerna a prutezzione di a biodiversità. Ghjè ellu chì surveglia l’appiecazione di e lege aurupee, da ch’elle sìanu « pràtiche è efficace »…
L’associ di a difesa di l’ambiente, cum’è Pollinis chì scumbatte pè a salvezza di l’ape, dinùnzianu l’opacità tutale di e decisioni è di u cuntenutu di i cartulari di u Scopaff. Ùn si cunnòscenu mancu i nomi di i so membri ! Pollinis hà fattu un inchiesta da sapenne di più nant’à st’urganìsimu chì tene sicretu u so funziunamentu è e so deliberazioni. S’hè imparatu cusì chì l’imprese di l’agruchimìa ci anu u so pesu, à u cuntrariu di l’associi di a difesa di l’ambiente, è di u sèmplice citatinu aurupeu.
Pollinis scumbatte contr’à e neonicotinoidi, ste molecule chì cumpònenu certi insetticidii è pruvuchèghjanu a morte di l’ape è tutti l’insetti pullinisatori. L’autorità sanitaria aurupea (EFSA) hà rispostu mettendu in ballu testi specìfichi per l’ape per studià di manera più precisa l’effettu di ogni pesticidii nant’à l’ape, i bufoni è altri pullinisatori. U scopu hè di pudè interdisce i prudutti periculosi rispunsèvuli di a calata di l’insetti ind’è a natura.
Ma ghjè u Scopaff ghjustu à puntu chì deve validà ssi testi… L’indùstriali fàcenu fronte contr’à ssi testi è u Scopaff l’aiuta. Hà frinatu quant’ellu pudìa a so validazione, ghjuridicamente o ind’è a publicazione di i protocoli. E multinaziunale di l’agrochimìa si sò dati di rimenu da pudè impedisce a lotta contr’à i neonicotinoidi. U so lobby hè ultraputente, ùn màncanu di soldi per pacassi esperti è avucati à buzeffu, urganizà cunferenze è evenimenti, allucinà l’eletti è i mèdia, cumbriculà è mette u dùbbitu nant’à e càuse di a morte di l’ape è e cunsequenze di i neonicotinoidi, porghje minaccia nant’à l’impiechi, sin’à attaccà in ghjustizia !… Face più di vint’anni chì l’indùstria di l’agrochimìa mette tràmpali à e dumande di l’EFSA è, à traversu u Scopaff, influenza e decisioni finale di l’Unione aurupea.
In 2018, u Scopaff hà ricusatu à Pollinis u drittu di cunsultà documenti interni per dimustrà u blucchime di l’interdizzione di i neonicotinoidi. Dapoi, una battaglia hè ingagiata per ubligà u Scopaff à rende trasparente a so azzione. U mediatore aurupeu li hà datu ragiò. Un ricorsu hè dunque postu di fronte à a Cummissione aurupea da ch’ella rispondi à ssa dumanda. Per appughjala sò decine di millaie i citatini à avè ziffratu a petizione di Pollinis per dumandà a trasparenza di u Scopaff. Voi dinù ziffrate. •
