Una settimana une parolla (O duie, o micca, sfidàtevi di e « parolle parolle parolle…»)
Φύσις τὴν φύσιν κυνηγεῖ, κ᾽ἡ γάτα τὸποντίκι. (Phusis tèn phusin kunègei, k’ègata to pontiki).
«A natura seguita a natura, è u ghjattu u topu ».
Pruverbiu grecu.
Salute à tutte è à tutti. Si festighjeghja sti pochi ghjorni u capu d’annu chinese è… «Basta ! Mi lavu chinese, sentu chinese, manghju chinese, dormu chinese, sognu chinese ». Ma chì faci tù dinù di pettu à a televisiò da a mane à a sera ? Và bè, parleraghju di… u Vietnam!
Or’dunque, quist’annu hè quellu di u topu. «U topu ! sò matti issi Vietnamiani ». Aspetta, prima studiemu l’orìgine di a parolla « topu ».
U Treccani ci ampara chì « topa », a fèmina di u topu, esce da u latinu « talpa » (sbrìgliulu) è chì, in Toscana, topa indetta talpa. Ma stu pìcculu animale cunnosce astre dinuminazioni : Ci hè, pè un dettu, a parolla indo-europeana chì t’hà datu u grecu μῦς (mus), u latinu mūs, u sanscrittu mūṣ. U puntu d’interessu ghjè chì sta parolla hà datu derivati inaspittati : mùsculu (Fruttu di mare bivalve) è mùsculu (Organu fibrosu, chì cuntrattèndusi pruduce i muvimenti di l’animali). Ben intesa, t’hà a stessa fonte l’inglese «mouse ». D’altronde, u latinu cunnosce « soricem» (cf. u francese « souris »), è u grecu ὁ ποντικὸς μῦς (ho ponticos mus) pè a bèllula o l’ermellinu. È in Bunifaziu, u topu campagnolu si chjama… pònticu !
Sicondu à una vechja leggenda, Buddà radunò l’animali di tuttu u Creatu è u primu à cumparì fù u topu. In segnu di ricunniscenza, Buddà dedicò u primu annu di u calendariu à u topu, è i seguenti à 11 astri animali. E qualità di u topu sò : astuzia, intelligenza, inventività, prudenza, emotività, gran’sessualità, gulusità, destruttività è intuizione.
Di 1897, u guvernatore generale di l’Indochina Paul Doumer creò 20 chilòmetri di fogni, ma, attempu, dete à i topi un spaziu ideale. À Anoi, di 1902, principiò una caccia à u topu. Una squadra di cacciatori principiò à tumbà i ruditori (di ghjugnu, èranu cacciati almeno 10.000 topi u ghjornu !), è fù pigliata a decisione di dà soldi à quelli chì derìanu a coda di u topu tumbatu.
Ma, unti è fini, i Vietnamiani allìvonu topi da vince i soldi…
Eccu a canzona : www.youtube.com/ watch?v=vLKBos4wTyQ
Marina Chovin.
