Ùn vole finisce sta guerra… Sò già decine di centinaie di milla morti in Ucràinia. Un millione di suldati rùssii sò morti (250.000), feriti o smariti secondu l’inchiesta d’un Think Tank americanu, u Center for Strategic and International Studies, publicata di ghjugnu scorsu. Parte di l’armata ucrainiana, si còntanu 400.000 vìttime frà i quali 60.000 à 100.000 morti. Decine di millaie sò struppiati, una cusì bella giuventù anientita… È ci vole à aghjustà i morti è feriti civili. L’annata 2025 hè stata a più murtale per elli è più di 6 millioni anu presu e strade di l’esiliu. Tuttu què cunduce à una crisa ecunòmica è suciale tremenda. Sò più di 14 millioni d’ucrainiani ch’anu bisognu d’aiutu umanitariu. A crisa s’hè ingullitu dinù 30% di l’impiechi, è l’infrastrutture vitale sò tocche assai, cum’è l’alimentazione energètica o l’acqua. L’Ucràinia, paese lìberu è indipendente, hè statu assaltatu da a prima armata mundiale. Trè anni dopu, decine di cità è parte sane di u paese sò scempiati è ci volerà annate di travagliu per ricustruisce. Puru, è malgratu e bombe rùssie chì schiàtanu, ssu travagliu ùn hà micca aspettatu. Si ricustruìscenu in permanenza, l’uspidali, e scole, i giardini, l’usine, l’alloghji. È in ssu cumbugliu di terrore, risplèndenu dimarchje curagiose. Frà quesse, l’attitùtine di decine di millaie di donne.
E donne ùn sò micca custrinta à entre ind’è l’armata, Ma ponu esse vulintarie. Dapoi u principiu di a guerra, numarose sò quelle ch’anu fattu sta scelta. Sò oghje più di 70.000 donne à serve ind’è l’armata ucrainiana. Frà e qualle 20.000 sò nant’à u fronte. Dopu à avè basgiatu i so cinnini, pàrtenu à scumbatte cù u rossu à e lapre o nant’à l’unghje. Èranu insignante, cumerciante, infirmiere, ingeniore, spurtiva prufissiunale o mamma di famiglia, è pòrtanu avà l’uniformu cum’ingaggiate vulintàrie. « Vogliu solu campà ind’u mo paese, ind’è a mo cità, ind’u mo appartamentu » dice Oleksandra Lysytska, « mi devu di fà qualcosa ». Yulia Sidorova ella, palesa : « sò sicura chì sè a Russìa ùn hè micca piantata, anderà più luntanu. Ùn avemu micca altra scelta, ci tocca à cuntinuà chì Poutine ùn s’arresterà ». A dunnetta conta quantu a vita è a securità ponu esse fragile : « m’arricordu in 2019 quandu sò ghjunta in Marioupol. Oghje ci rendimu contu quantu a securità hè una illusione, qualchi annata dopu, a cità hè stata cumplettamente strutta. In tant’ucrainiani ùn pudemu chì bramà di firmà in vita… L’Auropa ùn si rende micca contu di ciò chì si passa. A ghjente ùn capisce micca à chì puntu a guerra hè vicina è minaccia u mondu. Noi avemu u sintimentu chì a guerra hà da esse tremenda, massiva è mundiale s’ella casca l’Ucràinia, perchè Poutine ùn si pianterà ». Dice torna Oleksandra Lysystka, « ghjè un spaventu di vede chì a ghjente ùn s’accorge micca di l’ampiezza di u male. Ci vole à affucà sta malatìa oghje, nanz’à ch’ella si sparghji cumplettamente in Auropa. Per avà, si trova in Ucràinia è ùn vi hà micca tuccatu, ma vi ci vole à scumbatte l’infezzione sanguinària, ghjè una quistione di sopravvivenza ».
Un antra cumbattante, Katerina Pryimak hè presidente di l’associu Veteranka chì sustene l’armata è conta quantu « a Russìa manda i so suldati à fassi tumbà cum’è automati ». Dice torna, « i Russìi sò ancu di più crudelli quand’elli chjàppanu una suldata ucrainiana, e viulentèghjanu, e tassichjèghjanu »…
E donne ucrainiane sò sìmbulu di curagiu è di resistenza. •
