E scole corse anu un annu ! U custatu ch’hà purtatu à a creazione di sse scole assuciative d’insignamentu immersivu hè a situazione in perìculu di sparizione di a lingua corsa, malgratu e lotte cundutte dapoi 50 anni è più, azzioni è manifestazioni da tutte e mamme, è impegnu di i militenti di a lingua à u senu di l’Educazione naziunale. Tutti i specialisti di e lingue a ci dìcenu, per l’amparera efficace di una lingua, ci tocca à principià un insignamentu da chjucu chjucu. I parenti suvente ùn ponu micca assicurà a tramandera, elli stessi anu avutu ssa ruttura d’amparera da quand’elli èranu zitelli.
È ancu quandu un zitellu parla corsu o sente parlà corsu in casa, ùn basta micca. Li ci vole à esse ind’un bagnu linguìsticu in scola da pudè divente un bislingu tralintu è capisce dinù l’impurtanza di a lingua è u so rollu in a sucietà.
Cù ssu custatu quì, militenti di a lingua si sò aduniti annu per fà rinasce u vechju associu Scola Corsa creatu in l’annate 70, dalli un andatura nova è cusì apre e duie prime scole assuciative d’insignamentu immersivu. A dimarchja Scola Corsa ripone nant’à un associu maiò chì struttureghja a filiera cù l’aiutu di u retale Eskolim ch’adunisce l’inseme di e scole assuciative d’insignamentu immersivu in Alsazia, Brittagna, Catalogna, Paese Bascu, Occitanìa è dunque Corsica.
A Federazione indita a strategìa di a dimarchja, elabureghja a pedagugìa, cerca finanziamenti, hà i cuntatti pulìtichi cù u Statu (retturatu, ministeru), a Cullettività di Corsica, e merrìe è tutti l’attori stituziunali, s’occupa di furmà l’insignanti è l’aiute materne, furnisce à e scole ss’insignante è ss’aiute materne, è dinù tuttu u sustegnu finanziariu è pulìticu ch’elle abbisògnanu. Hè un impresa maiò ! Mà ùn pò fà tuttu. Per quessa, ch’ind’è a filusufìa di a dimarchja, sè a vita sculare hè u duminiu di l’insignanti, u scopu hè d’impegnà u più ghjente pussìbule in a marchja di a scola, spessu i parenti di i zitelli da ch’elli pòssinu seguità di manera attiva a scularità di i so figlioli. Hè impurtante pè i parenti, ma dinù pè i zitelli. Cusì, per ogni situ di scola, sò creati, cù i parenti è i militenti di a lingua chì s’impègnanu, un associu « lucale » ch’assicureghja u bon’funziunamentu pràticu di e scole : intrattene i lochi, face i pìcculi travagli necessarii, furnisce i prudutti di pulizzìa, u pìcculu materiale (e grande cummande si n’occupa a Federazione), o a robba da manghjà pè e feste per un dettu, seguita a cantina, urganizeghja animazioni o surtite cullettive da pudè rende l’amparera dimustrativu è impegnà i parenti à u latu di i so zitelli. Cusì, Scola Corsa hà già purtatu à u zoo i zitelli, sò intervenuti dinù attori culturali ind’è e scole, è l’associi anu previstu di purta i zitelli à vede fabricà u brocciu per un dettu, o arricoglie castagne, vede à fà a farina, ecc. Tutte l’edee sò benvenute !
U secretu di rièscita di e scole immersive hè ssu bagnu linguìsticu. U zitellu parla corsu, cù a maestra è cù i so pìcculi cumpagni di scola, u sente parlà ch’ellu sìa in u tempu sculare, ma dinù à a cantina, in a corte di recreazziò, è per tutte l’animazioni ch’elle ponu appruntà e maestre o l’associu lucale. I risultati sò tremendi ignilocu induve esiste un insignamentu immersivu, in Francia, in Auropa o in u mondu. Ma dinù in Corsica ! Ssu nùmaru speciale si prupone di fà u puntu di ssa prima annata di e scole corse. Testimunièghjanu tutti l’attori, presidenti, insignante, parenti, militenti. Una manera di ringraziali assai pè u s’impegnu à u serviziu di a nostra lingua !
Voi dinù vulete partecipà ? Scrivite i vostri figlioli (da 2 anni è mezu à 4 anni) in u retale Scola Corsa. Sustenìtelu (a cutisazione hè di 10 € è i doni sò benvenuti). Fàtene a publicità ! Inseme, sparghjimu a nostra lingua. •
