L’ottu di dicembre, I Voci di a Gravona hanu datu un bellu cuncertu à u Palazzu di i cungressi d’Aiacciu à prò di l’associu Scola Corsa di Sàrrula Carcupinu. Dui centu parsone èranu quì chì si sò campati di un cuncertu in u filu di l’armunìe è di l’ingaghjamentu di ssu gruppu criatu 30 anni fà, è chì rinasce oghje cù una squadra nova.
Sò trèdeci in scena, musicanti (una bassa, trè ghitarre è un viulinu), è cantadori, giòvani è menu giòvani, fra i quali uni pochi di parenti di i sculari chì siguìtanu a scola immersiva sarrulinca dapoi u principiu.
Ssa sirata ci hà parmessu di scuntrà l’amichi è i sustegni di a scola assuciativa chì conta avà 26 alevi, in prugressione di 85% d’un annu à l’altru. Ci sò oramai duie classe, una pà i più chjuchi in materna, l’altra par quelli di a grande sezzione è di u corsu priparatoriu, chì ampàranu quist’annu à leghje in lingua corsa. Tutti i parenti si rallègranu di e perfurmenze di e so criature in lingua corsa : prestu prestu, a capìscenu è a pàrlanu cù e so maestre è tra di elli, è dinù in casa è fora di a scola.
A putenza di u gruppu culturale I Voci di a Gravona ci hà fattu risente chì a squadra di parenti di Sàrrula hè supportata da sustegni sodi è numarosi.
Ci n’hè bisognu assai ch’ella hè par avà a sola scola immersiva in Còrsica suttana. Longa vita à scola corsa di Sàrrula, è forza à i parenti ! •
