Sò bellu più chè una cinquantina quelli à avè messu manu in pasta per ARRITTI. Uni pochi ci anu lasciati è ùn si ne scorda u nostru settimanale chì s’ellu hè ghjuntu oghje sin’à i so 50 anni, ghjè ch’ellu hè statu annacquatu da u so sudore è da a so generosità.
Luciani Alfonsi hè statu capiredattore in l’annate 80 è 90. Era dinù un militente preziosu di l’ARC, pò di l’UPC. Hè sparitu di maghju 1986. Hà cuntatu assai per ARRITTI.
Cù ellu Andria Fazi hè statu un redattore regulare durante tutte st’annate dinù. Hè statu frà i primi à scrive articuloni in lingua corsa. Per Andria, l’usu di a nostra lingua ùn era solu per parlà di cultura, tuttu si pudìa dì in corsu ! Elettu à l’assemblea di Corsica in u 1982, hè statu u primu à fà discorsi in lingua corsa. Si n’hè andatu di sittembre 1989. Ghjuvanni Mannarini hà cuntatu assai in a vita d’ ARRITTI. Fà campà un settimanale, costa caru. Da u principiu, in l’annate 70, hà sempre messu manu in stacca l’amicu Ghjuvanni, è ci hà sempre truvatu suluzioni di pettu à i capatoghji. Quand’a nostra stamperia hè stata per un dettu arruinata da un incendiu barbusu in u 1977, ci hà trovu mezu di pudè esse stampatu nant’à u cuntinente, aspettendu di pudè ripiglià fiatu.
Teresia Travaglini hà purtatu ARRITTI à longu à 20 anni di serviziu fidu è generosu. Era di ssi sustegni preziosi daretu à i tendoni, à tene arritta a gestione di u settimanale. Ci hà lasciatu un viotu tamantu in u 2014. Numarosi incù elli si ne sò andati. Tutti, i tenimu per sempre ind’è i nostri corsi.
