Felì serà in cuncertu u 7 è l’8 d’ottobre pròssimu.
U Spaziu culturale Carlu Rocchi in Biguglia s’aspetta à campà un spetaculone ! Felì serà nant’à a scena cù deci musicanti è choristi per accumpagnalu. Hè a so prima è ùnica data di quist’annu è u spetàculu sarà arrigistratu in live per un discu ch’hà da esce in principiu di dicembre.
A so vucione ci hà mancatu dapoi a crisa sanitaria è u so ritornu nant’à a scena hè un evenimentu aspettatu. Dapoi u 1981, in u filu di u riacquistu chì l’hà annanatu, Felì, ghjè a voce, a mùsica, a puesìa, cù u munumentu di cultura ch’ellu era Ghjuvan’Tèramu Rocchi ch’hà scrittu tante canzone magnìfiche, Felì ghjè l’amore di a lingua, di a cultura, di a terra, di a lotta landana di u nostru pòpulu. Ghjè a spartera cù l’altri pòpuli, a tramandera pè e nove generazioni, cù u travaglione ch’ellu face cù i zitelli di Scola in Festa ! Felì ghjè un imbasciadore di a cultura corsa, una ràbbia nant’à scena, un energìa tamanta, una vuluntà d’esse. Felì ghjè un creatore, un riferimentu è una surgente per tanti è tanti giòvani corsi. S’aspetta ssu mese d’ottobre cù impazienza. Pigliate in fùria e vostre piazze ! •
Riservazioni : www.biguglia.corsica
