Dopu à più di sei mesi di scuntentezza in Francia cù e manifestazioni di i curpetti gialli, u disprezzu di u guvernu in risposta, è a viulenza in carrughju, quale pò stunassi di u risultatu di u partitu di Le Pen per l’elezzioni aurupee di dumènica scorsa ? Mondu più chì i mèdia, bipularizendu u dibàttitu pulìticu, anu ingunfiatu artificialmente e duie liste, quella di u guvernu, è quella di Le Pen. Ma cum’hè chì tutta sta ghjente stumacata ùn hà micca vutatu frà e liste gialle, scigliendu piuttostu a lista fosca di Marine è di u so coprifaccia Jordan Bardella ?
Ci sò quelli chì pàrlanu di catastrofa, mughjendu à u perìculu neru, è d’altri chì rilativisèghjanu ammentendu chì s’ellu spunta per l’aurupeane, u partitu di Le Pen, cala in furia dopu pè i scrutini di prussimità.
U fattu si stà chì per dì a so zerga, oghje, a ghjente sciacca u bigliettinu di a strema dritta. Umbeh ! Ci volerà forse à psicanalizà ss’andatura chì si stalla di più in più, ma hè un fattu. I conturesi mediàtichi à dìcenu bè, sparghjèndu à chì ne vole sente interviste di ghjente chì si dìcenu stumacati, bramosi di cambiamentu. Ci volerà à spiecacci cumu pò vene u cambiamentu cù u prugramma di chjusura di Le Pen… Un pocu cum’è u referendum di u Brexit mette oghje in i capatoghji è un parapiglia è tene di l’altru mondu a ghjente chì l’anu prupostu, è vutatu. Puru, s’omu fieghja un pocu di più vicinu, u FN o u RN, ùn cresce tantu per ss’elezzione. Da 24 eletti in u 2014, cù 24,86% di i voti, ne ritrova trà 22 o 23 sta volta, cù 24,2% di i voti. Ma supraneghja di 2 punti u partitu di u presidente di a Repùblica è ssu fattu solu face l’effettu, piuttostu burladore, d’un ciambuttamentu in a vita pulìtica francese allora chì l’equillìbriu di sta parte quì ùn cambia tantu.
A vera scuzzulata, più pusitiva, si trova in fatti ind’è l’alternativa pruposta da i Verdi. Pruvucheghja à tempu, a cunferma di a calata spetaculare di a manca è di a dritta tradiziunale chì sò i veri insignamenti di ssu scrutinu. L’elettori si cèrcanu. S’imprimurèghjanu di u climà, a biodiversità, a ghjustizia suciale, u benestà animali, è vanu à circà altre liste. A più sèria è credìbile, Auropa Eculugìa i Verdi, face una crèscita forte, ch’ùn anu sappiutu vede i sundagi, burladori anch’elli. Ma d’altre liste, cum’è quella di l’animali, accèrtanu dinù ssa tendenza.
In e regioni dette identitàrie chì bràmanu di più autunumìa è ricuniscenza di e so lingue, e so culture è u s’avvene da custruìscesi da per elle, u votu verde hè in crèscita più forte. Sarebbe veramentu un prò tamantu s’ella si cunfirmeghja. In tutti i casi, a Corsica ci hà vintu un deputatu aurupeu, è quessa hè una bella avvanzata. Sciaccamanate à tutti quelli chì ci anu travagliatu !
Fabiana Giovannini.
