Sàbatu u 17 d’ottobre da Cavru à Aiacciu, sarà a 5a edizione di a Currilingua, a corsa di a sulidarità pè a nostra lingua. Si corre per fa a prumuzione di a lingua corsa, è cù i soldi ammansati si sustene l’iniziative à prò di a so amparera è a so prumuzione. À l’iniziativa di u cullettivu Parlemu Corsu, tutti l’anni, sò chjamati à scrìvesi associ, sindicati, squadre spurtive, scole, imprese, o puru gruppi d’amichi. A scrizzione hè di 100 àuri. Ugnunu corre (o marchja) unu o parechji chilòmetri, cum’ella li pare, è i partecipanti si pàssanu un testimoniu, da a partenza sin’à à l’arrivata. Una corsa sulidaria à tutti i punti di vista ! Quist’annu si parte da Cavru à 2 ore è si ghjunghjerà in Aiacciu ver di 7 ore è mezu.
Sustenite a vostra lingua. Scrivìtevi ! Micheli Leccia per Parlemu Corsu risponde à e quistione d’Arritti.
Chì ghjè a Currilingua ?
A Currilingua hè una corsa chì ci pirmetti d’accodda solda parchì si paga u drittu di participacci. Cù 100 € si pò entra in a corsa. I participanti pìddani u ingagiamentu di rializà un chilòmitru in particulari parchì hè una corsa cù un passaghju di tistimoniu (par custruì una catena di sulidarità chì mai si rompi), ma poni corra di più chè un chilòmitru s’eddi vòlini.
Si corre di manera individuale o cullettiva ?
Ci pò essa unu o parechji curridori chì riprisèntani una « antità » chì capunanzi avarà datu i solda. Ssa antità pò essa una parsona à tìtulu individuali o un gruppu d’amichi, un pìcculu cumerciu o una grossa impresa, un associu culturali o un club spurtivu, a cuupirativa d’una scola o una cumuna, ancu un sindicatu ma micca un partitu pulìticu…
È s’aiuta cusì prugetti à prò di a nostra lingua ?
Iè. Di sicuru, solda in più chè 100 € sò i benvinuti parchì ci aiùtani à finanzà prugetta à favori d’a lingua corsa. I prugetta dighjà sustinuti sò purtati da associa (Fiuramossa, Scola Corsa, Basta à parlà, I Scontri di Cathy, Morra Murrina) o purtati da no stessi (Rubutiscola, Furmànima, Chì si faci ?)
A Currilingua so dighjà quattru idizioni, à mumenti avaremu fattu u giru di a Corsica.
Voi dinù vinite à participà ! •
