Un impurtante delegazione di Scola Corsa, cundutta da Francescu Alfonsi, aurudeputatu chì finanza ssu viaghju di studiu, è u presidente di Scola Corsa, Ghjiseppu Turchini, hè partutu in Béziers à scuntrà i rispunsèvuli di l’Istitutu Supranu di e Lingue di a Repùblica Francese (ISLRF). Membri di l’associu Scola Corsa, raprisententi di i parenti di e duie scole, partenarii di centri di furmazione in Corsica, maestre, si dispiàzzanu dunque per studià u sapè fà è u funziunamentu di i centri di furmazione di l’ISLRF. Cumè in Paese Bascu eri, in Occitanìa oghje.
L’ISLRF hè l’urganìsimu di strutturazione è di furmazione di tutte e scole assuciative immersive di Francia attaccate à u retale Eskolim. E so furmazioni è u so diplomu sò ricunnisciuti ufficialmente à u stessu livellu chì a furmazione di l’insignamentu pùblicu o di l’insignamentu privatu cunfessiunale in Francia. Posti sò da strappà ad ogni rientrate in funzione di e dumande è i bisogni accertati. Dapoi a so creazione, in u 1996, l’ISLRF hà furmatu parechje centinaie di maestri pè e filiere brittone (Diwan), basca (Seaska), catalana (bressola), occitana (calendreta), alsaziana (ABCM-Zweisprachigkeit). Scola Corsa hà integratu u retale in u 2021. Ogni filiera d’insignamentu immersivu hà u so pròpiu centru di furmazione. Scola Corsa appronta u soiu è ssu viaghju in Béziers hè dunque assai impurtante pè a sèguita di a custruzzione di a filiera corsa. U scopu hè di furmà l’insignanti ch’abbisogneranu e scole assuciative immersive di Corsica. Per oghje, si principia, Scola Corsa conta solu duie scole, in Bastia è in Biguglia, aperte à a rientrata 2021. In 2022, cresceranu tutte e duie di livellu cù una classa di più è doppieranu i so bisogni in insignanti è in aiute materne. S’apreranu dinù altre scole in Cismonte, in u circondu bastiacciu, ma dinù in Pumonte in u rughjone aiaccinu, ch’averanu ancu elle bisogni di persunali. St’annata 2022 cunterà dunque un passu di più impurtantìssimu ind’è a marchja in davanti di e scole d’insignamentu immersivu di Corsica. U futuru centru di furmazione di Scola Corsa s’appughjera nant’à partenarii è prufissori di qualità per furmà i so elevi-insignanti, ma dinù sparghje furmazioni à l’aiute materne, per un dettu, o à l’educatori di l’animazioni pedagògiche perisculare. Ci vole à sapè chì una filiera d’insignamentu immersivu hè creatrice d’impiechi perch’è i bisogni sò maiò per dà un insignamentu di qualità à i zitelli. In giru à una scola nasce una dinàmica forte. Per oghje, simu à i primi anni di ssa custruzzione in Corsica ma quandu e scole strapperanu à u Statu a so cuntrattualisazione pè a presa in càrica di e pache di l’insignanti, ssa dinàmica crescera in fùria.
L’ISLRF hè un urdignu impurtantìssimu per accumpagnà ssu bellu prugettu. In più d’esse u centru di cuurdinazione di e furmazioni di i maestri d’insignamentu immersivu in tutte e regioni cuncernate da una lingua regiunale à salvà, hè dinù un centru di ricerca è di risorze nant’à l’immersione linguìstica in generale. Un urdignu pè a pedagugìa, un locu di sperienza spartuta, di risorze è di sapè fà. Ci vole à salutà sti militenti di e lingue chì s’impègnanu dapoi anni per strutturà ss’urdignu è ssi mèttodi cumuni. A filiera Scola Corsa hà da prufittà di sse cunniscenze maturatu. Arritti vi cunterà da quì à pocu i risultati di ssu viaghju in Béziers. Longa vita à e lingue regiunale ! Longa vita à l’insignamentu assuciativu immersivu ! •
