Una via, eccu u quartu dischettu d’un gruppu natu di 1996, ingiru à i fratelli Jean-Michel è Fabrice Andreani.
Quand’ellu sorte u so primu dischettu, i dui fratelli ùn anu chè 13 è 16 anni ! Dopu à cinque anni di silenziu, st’òpara, chì hè surtita issi pochi ghjorni, hè stata arrigistrata ind’una villà bastiaccia. E temàtiche sò vàrie è a tradizione ci hè : i canti di a tribbiera, per un dettu (làsciami sperà), t’hà un’aria à l’usu anticu, ma c’entre a guittara è una mùsica oghjinca.
Questu u dischettu hè statu corializatu cù Rick Allison, di rinumata mundiale : ghjè ellu chì t’hà cumpostu e più belle canzone di Lara Fabian, Chimene Badi, ma hà dinù travagliatu per Johnny Halliday, Maurane, Michel Sardou… In quant’à e parolle, sò state scritte da Ghjuvanfrancescu Mattei, Marc Ventura, Henri Olmeta, cù a participazione di Fabrice et Jean-Michel Andreani. Ci sarà un grande cuncertu à u teatru di Bastia u 19 d’aprile, po un giru pè issi paesi corsi.
D’una canzona à l’astra, viaghjemu da u passatu sin’à l’avvene, passendu per l’oghjincu. È quandu si parla di u passatu, ghjè in leia cù l’oghjincu o u dumane. In làsciami sperà, a temàtica è l’aria sò tradiziunale, spùtiche à i canti in l’aghja, ma e parolle è a mùsica sò di l’oghje è di l’avvene (u cantatore invita à ingrandà). In Sessant’anni ad avà, ùn ci hè chè silenziu, chè bughjura. Ma, per via d’una prumessa fatta sessant’anni fà, si dumanda u cantatore chì saranu i ricordi, s’ellu ci sarà a furtuna…
L’oghjincu hè dinù giratu ver di l’avvene : in Una via, u tempu di dumane si campa oghje è avà. In Adunì, u custatu hè amaru : Quant’ellu ci n’hè guai pè a terra unita. A suluzione ? Adunisce u mondu. T’aghju in la mente ci parla di l’alba, di « quandu u chjarore dice digià/Ch’è tù mi ferai vultà ». In Hè ora digià, u cantatore sà ciò ch’ellu pò dà : fà inseme issu viaghju. In quant’à l’avvene, hè unnipresente. In Avà, ci vole à inventà un mondu novu chì « hè ghjunta l’ora, avà spera/per tutti i to lindumani », in U sole di mezanotte, pichja l’avvene. Un’antra storia c’invita à scrive un’antra stòria. Infine, in Forza di l’esse, ci hè « un raggiu di sole per un mondu chì và ».
Eccu dunque un bellu dischettu chì sente u poprock, un scontru riesciutu trà i fratelli Andreani, i so musicanti, è Rick Allison. Scialàtevila…
Marina Chovin.
