Surisi da tutte e mamme, ochji lucichenti, abbracciate, mughji, salti scimattuliti, balli impruvisati, canti à voce rivolta, stupore è incantu… l’allegrìa hà vintu in furia in furia tutti i carrughji da Ersa à Bonifaziu dumènica sera !
Paesi è cità, presi in una gioia abbacciacante si sò empiuti d’un emuzione cullettiva scumpartuta strasurdinaria. Da tutte e parte, si sentìanu i « Popopo pooooo !… » è i scaccanosi « poca chjìbba ! »… è altre tante « saetta ! » è «magnìficu ! »… nanzu di lacà pocu à pocu a piazza à l’« Evviva ! » radiosi… è i mughji di «Vittoria ! » in un passu è vene di vitture trumbittente ! Belli mumenti cummuventi, stonde stòriche cusì belle è cusì tantu bramate dapoi decine d’annate ! À mezu à u spetàculu di e bandere more schiaffitendu, e làcrime sò ghjunte à più d’un sguardu spampillulenti di piacè ! L’aghju vistu pienghje ssi militenti di e prim’ore, l’aghju vistu gode ssi mumenti preziosi, tamantu piacè ! Tamanta fiertà ! Tamanta nustalgìa dinù di quelli chì si ne sò andati senza pudè campà ssi mumenti beati. Anziani, ghjuvanotti, zitelli, un pòpulu felice hà fattu a festa, imbriacu di speranza è di fede in l’avvene.
I prigiuneri è i ricercati èranu in tutti i cumenti, cù u secretu pensà di porghje infine a suluzione pulìtica chì permetterà di girà a pàgina di 50 anni di cunflittu d’iss’èpica cuntempurànea.
Eccu à cosa s’assumigliava a Corsica dumènica à e prime stimazione di a vittoria tant’aspettata ! Eppuru, à tempu à a gioia schieta è cumunicativa, ci era dinù cum’un riguardu, una spezia di ritegnu, a cuscenza di campà una stonda colma d’allegrìa, iè, ma dinù un mumentu sèriu è impurtantìssimu, una pàgina di stòria munumentale! Eppò a rispunsabilità chì pesa nant’à e spalle di l’eletti, un inchjerchjata ind’è a vita di u nostru paese, u duvere è a faccenda immensa chì ci aspetta ! Tutt’ognunu era cusì ingordu di sente e parulle di i nostri capifili nant’à e scene di i mèdia, per truvà assicuranze, esse belli sicuri ch’ùn sunniàvamu micca è capisce cumu s’avia da passà a sèguita. Ùn hè chè ver di i 10 ore ch’anu rimbubatu infine i canti cullettivi sott’à u tendone firmatu nant’à u mercatu di Bastia dopu à a Spassighjata, o in e sfilarate impruvisate in i carrughji aiaccini, curtinesi, o balanini.
Smenticatu u freddu è a fatica, omi è donne è zitelli alzendu e bandere, si spannàvanu in a cumunione cullettiva. Sò mumenti belli ma troppu corti è passageri. Digià, piazza hè fatta à u travagliu chì ci aspetta ! Evviva !
Fabiana Giovannini.
