Stu 26 d’ottobre, in mancu 10 minuti d’una parudìa di prucessu induv’ella ùn hà pussutu sceglie u so avucatu, è fattu in visiocunferenza, Zahra Tabari, 67 anni, hè stata cundannata à a morte da u tribunale di Racht in Iranu.
Arrestata d’aprile 2025 per avè sustenutu u muvimentu « Donna, Vita, Libertà », Zahra Tabari hè accusata di terrurìsimu. E prove di l’accusazione sò un pezzu di stracciu induve èranu scritte trè parulle « Donne, resistenza, libertà ». Chjamendu à l’aiutu, u so figliolu palesa : « a mo mamma hè imprigiunata dapoi più di sei mesi, u prucessu ùn hà duratu chè deci minuti è u ghjùdice hà annunziatu a so cundanna à a morte cù u surisu in bocca. L’avucatu ùn l’hà difesa, è ùn hà micca cuntestatu… Tuttu u prucessu ùn era chì a messa in scena d’un spetàculu decisu à l’avvanzu. A mo mamma ùn hà nisun leame cù gruppi pulìtichi, e càriche ritenute contr’à ella sò state fabricate » dice torna u figliolu. A famiglia di Zahra chjama tutti l’associu pè a difesa di i diritti umani, i mèdia è l’opinione pùblica à fà tuttu per fà piantà sta cundanna à a morte è dà à Zahra u drittu à un prucessu ghjustu. A resistenza iraniana chjama a cumunità internaziunale à porghje aiutu per salvà a vita di Zahra è di tutti l’altri cundannati à a morte in Iranu.
In 2023, l’Iranu hà prununziatu 853 cundanne à morte secondu Amnesty Internaziunale, ma dice l’associu, forse sò di più. « Manifestanti, oppunenti, membri di cumunità etnica sprezzate figùranu frà quelli impiccati. L’autorità si ghòvenu di a pena di morte cum’è un arma da sparghje u terrore frà a pupulazione è affucà a cuntestazione » spieca Amnesty Internaziunale. « Senza reazzione mundiale vigurosa, l’autorità iraniana cuntinuerà à tumbà millaie di personi… L’attache di l’Iranu contr’à u drittu à a vita chjama di manera urgente a cumunità internaziunale à fà pressione nant’à l’autorità iraniane, da ch’elle piàntinu l’esecuzioni ». Amnesty Internaziunale chjama dinù da mette in ballu un mecanìsimu indipendente d’inchiesta è d’obligazione di rende contu. I tribunali ùn sò micca indipendenti in Iranu, dice torna l’urganisazione di i diritti umani. Sò sott’à a pressione d’urgani di securità è di rinsignamenti di Statu, è s’appòghjanu nant’à dichjarazioni furzate, strappate sott’à a tortura, da pudè prununzià cundanne à a morte è sbarrazzassi di l’oppunenti. Parechji sò cundannati è tumbati senza chì a so famiglia nè sappia nunda. Certe famiglie cèrcanu sempre i soi. È certi impiccati avìanu menu di 18 anni.
Dapoi u principiu di l’annata 2025, più di 1000 personni sò state impiccate da i mollah. Forse di più chì u regime ricusa di dà un bilanciu. « A crèscita di l’esecuzioni in Iranu vene à livelli spaventosi » dice torna Amnesty Internaziunale. « Si ghjòvenu di a pena di morte per affucà a resistenza ». Di lugliu scorsu, l’Organisazione di e Nazione Unite s’hè impenserita anch’ella di sta crèscita tremenda è chjama u regime iranianu à piantà sta pulìtica. « A repùblica islamista hà lanciatu una campagna di macellu in e priggiò iraniane, ùn pò chè cresce ogni ghjornu senza reazzione internaziunale » dice u direttore di l’associu Iran Human Rights, Mahmood Amiry Moghaddam. « L’esecuzione arbitrarie è generalizate di prigiuneri, senza rispettà e guaranzìe di prucedure è di prucessu ghjustu, sò crìmini contr’à l’umanità è dèvenu esse una priurità di a cumunità internaziunale » dice torna l’IHR.
Libertà per Zahra Tabari è tutti i cundannati ch’aspèttanu in u curridore di a morte. •
