Alain Bauer, prufessore di criminologìa, direttore scientìficu è vicepresidente di u Cunsigliu scientìficu di u polu Securità Difesa di u CNAM (Cunservatoriu naziunale di l’Arte è i Mistieri) si sprimava duie simane fà à a televisiò nant’à u casu di a più grande centrale nuclearia d’Auropa, in Zaporijia. Dapoi u principiu di a guerra in Ucràinia, si ne parla ogni tantu : ci si pesa una minaccia tremenda. Oghje sempre occupata da l’armata rùssia, ferma in mira da i Rùssii cum’è da l’Ucrainiani. L’Agenzia Internaziunale di l’Energìa Atòmica, u gendarmu mundiale pè u nucleariu, parla d’un « rìsicu grave d’accidente nucleariu è di situazione imprevisìbile ». Alain Bauer dice anch’ellu « ci hè una minaccia tamanta in Zaporijia. Hè occuppata di manera militare, ciò ch’era impensèvule per una centrala… è i Rùssii si sò ghjuvati di terre radiuattive per fà trancee ». Ma pè u più, a centrale hè diventata un inghjocu induve i dui prutagunisti ghjòcanu à fassi paura. L’Ucràinia hà pruvatu parechje volte à sregulà un matrale chì ghjove à u rifritamentu di a centrale per cunduce i Rùssii à abandunà i lochi. U prublema hè ch’ellu pò accade un accidente. Senza cuntà chì l’impiecati sò stanchi, struffulati è minacciati anch’elli da l’armata rùssia, ind’una pressione cuntìnua, anu pocu tempu di riposu. L’agenzia rùssia Rosatom ch’hà presu e cumande si dice in difficultà per fà funziunà currettamentu a centrale. 18 cità à l’intornu sò state evacuate u 7 di maghju scorsu. « Zaporijia ghjè Cernobile putenza quattru » dice torna Alain Bauer. In 2022, a centrale era stata tocca da e bombe rùssie. « Sò vere minaccie » secondu à Greenpeace chì dumanda à ciò chì tutte e centrale nuclearie d’Auropa pòssinu fà testi di cuntrollu di resistenza per prevene situazioni sìmule in tempu di guerra. « I stress-tests à a guerra dèvenu include l’evaluazione di a vulnerabilità di i reattori in casu di pèrdita di l’alimentazione elèttrica è di l’impattu di i rìsichi cuncernendu u rifritamentu » dice l’associu di difesa di l’ambiente. Greenpeace dumanda dinù sanzioni contr’à Rosatom. Hè impensèvule di dà di pettu à una guerra contr’à a Russìa in Auropa è di cuntinuà à avè rilazioni cumerciale cù a so agenzia nuclearia. « U guvernu francese hè prontu à tuttu per difende a so indùstria nuclearia ch’hè in lea cù u regime di Poutine. Dinunzià l’agressione rùssia è prutege di manera attiva Rosatom à u livellu aurupeu ghjè tutalmente ipocritu. Sta caranavalata deve còmpiesi è a Francia deve arrestà d’oppònesi à e sanzioni contr’à u nucleariu rùssiu » dice torna Greenpeace. A centrale ammansa soprapiazza Uranium 235 è Uranium 238 chì ghjòvenu à a so alimentazione. S’elli sò tocchi da e bombe, u rìsicu di righjettu radiuattivu hè grande. In casu di tagliature elèttrica, dinù, u sistema di rifritamentu di i reattori ùn puderebbe più funziunà, aprendu a porta à un rìsicu di fusione di u cumbustìbule è di pulluzione radiuattive chì pò pruvucà una splusione di u locu di cunfinamentu. E cunsequenze serìanu tremende per tutta l’Auropa cum’ella hè accudutu in Cernobile.
Stu 22 di maghju, a centrale di Zaporijia è quella di Dniepr èranu torna arrestate per vìa di a stanciata di a so alimentazione elèttrica, annunziava Rosatom. A centrala conta sei reattori di 1000 MW ognunu, vale à dì una putenza elèttrica di 5700 MW, cinque volta di più chè Cernobile à l’èpica. •
