V’arricurdate di ssu cinninu ch’era statu abbandunatu ciucciu ind’una spiaggia di Djibouti ? Avìa qualchi ghjornu è nimu ùn hà truvatu di quale era… Karama hè cresciutu in un urfanatu sin’à l’età d’un annu quandu un coppiu ghjuntu da Metz u scòprenu cù i so ochjoni tristi è sbandunnati… Quelli chì diventeranu i so parenti càscanu innamurati. A mamma avìa a doppia naziunalità, nativa di u paese, era in Djibouti ghjustu à puntu per adduttà cù u so maritu francese. Tuttu si passa bè, u zitellu li hè prisentatu, ritrova u surisu, s’abitueghja à i so parenti… Elli, fàcenu u passu è vene per visitalu aspettendu chì tutte e prucedure sìanu fatte sopralocu è trà i dui paesi… è l’adduzzione hè prununziata, u ciucciu pò infine seguità i so parenti per campà a so nuvella vita… ma… ghjera senza cuntà a stupidezza di certe règule amministrative è sopratuttu di u zelu di certi funziunarii senza furmazione o puru senza umanità. U visà per fà entre in Francia u zitellu ùn hè micca datu è ci hè vulsutu à scumbatte più d’un annu torna per francà st’ùltima tappa chì duvìa esse una sèmplice furmalità è s’hè mossa in tràmpalu per prutege u territoriu francese d’une ciucciu di dui anni ! Intervenzioni da tutte e mamme, petizione, è ancu una deliberazione di l’Assemblea di Corsica, ch’ùn era cuncernata postu chì l’affare si passava trà Djibouti è Metz, ma un associu creatu ind’è noi, u Cullettivu corsu per l’adduzzione senza razzìsimu stituzziunale (CCari) scumbatte ancu ellu. S’hè creatu per dinunzià u fattu chì nant’à e lege chì règenu l’adduzzione in Francia, ci sò scritti razzisti ch’ellu ci vulìa à caccià. Hà vintu è ssi scritti sò stati scambiati. I parenti di Metz avìanu chjamatu à l’aiutu stu Cullettivu. In grazia à ellu, i parenti di u chjucu anu pussutu ottene infine u famosu visà ! L’Assemblea di Corsica ch’hà appughjatu st’azzione per sèmplice ragione d’umanità, s’hè cusì scritta ind’è u filu di a stòria di l’Isula di i ghjusti pè vìa di a so azzione durante a seconda guerra mundiale è e strage di a shoa… CCari s’appoghja nant’à u principe internaziunale chì supraneghja tutte e lege di tutti i paesi : I’interessu supranu di u zitellu. Di pettu à st’interessu supranu chì s’imprimureghja di prutege a zitellina nanzu à tutt’altra cunsiderazione, nisun lege, nisun regulamentu, nisun funziunariu, nisun prucedura abituale deve piglià u passu. Invece, oghje, è Arritti n’hà parlatu à parechje volte, una ciuccia di dui anni è mezu hè chjosa in un orfanatu in Meknes, per vìa ghjust’à puntu di règule amministrative ch’impedìscenu di riparà sbaglii è mancanze ch’anu fattu un paghju di funziunarii ch’ùn vòlenu ricunnòscela. U ministeru hà trasmessu l’avisu sfavurèvule di a CdC è ancu ellu ùn ghjunghje à rivene nant’à ssi sbaglii per vìa chì, di règula, ghjè a CdC chì face l’inchiesta… U ghjùdice ancu assai vene di dà torna una settimana per ottene stu famosu graal chì duvìa esse à l’iniziu una sèmplice furmalità è si trasforma cum’è per Karama in Everest chì nimu ùn sà cumu francà ! L’interessu supranu di a zitella hè di piantà ste lètiche trà i servizii per riparà e scumpiture fatte. A mamma hà tutte e cundizioni per accoglie sta ciuccia chì s’hè abituata à ella è a riclama. S’aspetta dunque l’avisu favurèvule per fà vene Wissal in Corsica ! U so nome in corsu, vole dì Unione di duie personi… preghemu per ella. •
