A rivendicazione autunumista ùn nasce micca cù l’evenimenti d’Aleria in u 1975. Ci rinasce.
In fatti, a brama d’autunumia hà più di 250 anni di stòria in Corsica. Fù pruposta à Gènova in u 1754. Pò dumandata parechje volta à a Francia. Pasquale Paoli, quand’ellu hè vultatu da u so prim’esiliu d’Inghilterra in u 1790, bramava d’un autunumia sott’à a prutezzione di a rivuluzione francese…
In u 1914, Santu Versini di u ghjurnale A Cispra, a rivendicava. In principiu di l’annate 20 sin’à u 1939 hè stata dinù sparsa in i scritti di u ghjurnale A Muvra.
In u 1964, ne parla u Manifestu di u CEDIC (primi passi di a rivendicazione cuntempurànea lampati da una manata di corsi frà i quali Màssimu Simeoni, Paul Marc Seta è Gabriel Le Bomin). In u 1966, Màssimu Simeoni fonda Arritti per purtà ogni settimana a voce di l’autunumia.
In u 1967, a nàscita di l’Azzione Regiunalista Corsa (ARC) si face nant’à ssa speranza.
U 27 d’aprile di u 1969, De Gaulle prupone un referendum nant’à a regiunalisazione di a Francia. Racoglie 54 % di voti in Corsica, sola regione chì dice iè à u generale…
In u 1971, l’ARC diventa Azzione pè a Rinàscita di a Corsica è rivendicheghja ufficialmente l’autunumia pè a Corsica è u pòpulu corsu.
In u 1973, a brama a Chjama di u Castellare…
In u 1974, l’ARC publicheghja u libru Autunumia. Pò vènenu l’evenimenti d’Aleria, « più nunda ùn serà cum’è nanzu »…
In u 1974, Liber Bou nanzu à Aleria face a so cacciata : « ancu 200.000 autunumisti ùn basteranu à mudificà a Custituzione »… a lotta s’hè allora radicalizata. Creazione di u FLNC in u 1976…
In u 1991, l’UPC (Unione di u Populu Corsu) publicheghja un prugettu di lege ind’una edizione attualizata di Autunumia. Attentati, drama, prigiò, mondu sacrifizii, divisioni, affruntamenti po fine di a lotta armata in u 2014. Dapoi, elezzioni dopu à elezzioni, a rivendicazione s’hè sempre di più arradicata.
È ci simu oghje, dopu à 60 anni di lotta pè a perioda cuntempurànea. U caminu ferma longu ma ne dibàttenu e più alte raprisentazioni naziunale in Francia. À rombu di luttà, a strapperemu. •
