U 7 di lugliu 2017 era u primu anniversariu di u Pattu d’abulizione di l’arme nuclearie zifratu da 122 paesi in u mondu. Ogni istatina, u 6 è u 9 d’aostu, pè a cumemurazione di e bombe di Hiroshima è di Nagasaki, ci hè una ceremonia « pè a pace ». Quist’annu, u merre di Nagasaki, Taue Tomihisa, hà parlatu di u « Pattu per l’interdizzione di a spluttazione, e prove, a pruduzzione, l’ammansu, u trasferimentu, l’usu è a minaccia di l’utilisazione di l’arme nuclearie » chjamendu : «Mai più d’hibakushas ! » L’hibakushas, sò e vìttime di e bombe atòmiche. « Ssa brama fà move numarosi paesi in u mondu è hà datu nàscita à ssu pattu di l’abulizione di l’arme nuclearie aduprate da 122 paesi, vale à dì più di 60 % di i paesi membri di e Nazioni Unite » dice Taue Tomihisa. Face 38 anni ch’elli lòttanu l’hibakushas da ch’ella pianti « ss’atrocità umane». Oghje, fèrmanu sempre 15.000 arme nuclearie in u mondu. Vale à dì, di chè fà saltà a pianetta parechje volte !
A crisa trà u dittattore mezu scemu Kim Yong, è u scimaticone Donald Trump ci ramenta quant’ellu hè necessariu di primurassi di ssu perìculu. Hà dettu torna Taue Tomihisa « i paesi ch’anu l’arme nuclearie s’oppònenu à u pattu, hè dì quantu u nostru caminu ver di un mondu senza nucleariu ferma scuru. Fà campà u pattu hè impurtante per l’Umanità » U Giappone, in tantu chì solu paese ad avè suffertu di e bombe atòmiche, ùn hà ancu zifratu u Pattu. Pare una fola ! Conta Fukahori Joshitosi, un hibakushas : « Eru à u travagliu à 3,6 chilòmetru di u puntu zeru, vale à dì u locu d’impattu di a bomba.
À 11 ore è 2 minute, una saetta bianca hà schizzatu è un rimore di splusione s’hè fattu sente. Mi sò piattatu sùbitu sott’à u tavulinu. Dopu, rientrendu in casa mea, aghju scontru nant’à a strada ghjente chì mi dicìanu « ùn andate più luntanu, a cità hè in focu». Aghju aspettatu un pocu. U lindumane matina, sò andatu à a gara di Nagazaki, marchjendu nant’à via ferrata. A gara, a mo cara cità, tuttu era sparitu, mi parìa esse ind’un altru mondu. Sò ghjuntu in casa mea. Era strutta anch’ella. A mo surella era morte nentru. » 74.000 personi sò morte in Nagasaki. 140.000 in Hiroshima. Ci sò state centinaie di millaie di ferite dinù. È uni pochi chì a s’èranu francati sò stati tocchi da malatìe scunnisciute, è ne sò morti. Dice torna Fukahori Joshitosi « l’umanità ùn pò campà cù u nucleariu… Dopu à a seconda guerra mundiale, u Giappone hà evoluatu cù a so Custituzione pacìfica. Ùn duvimu perde sta làscita.
Avemu un duvere in tantu chì solu paese ch’hè statu bumbardatu ». Dopu à tamanta suffrenza, cum’anu fattu i Giappunesi à fà cunfidenza à u nucleariu pè a so alimentazione elèttrica ?
Fabiana Giovannini.
