1992-2022, 30 anni dopu à a catastrofa di Furiani, a Corsica ùn hè ancu à fà sanu u so dolu. Ci hè vulsutu 30 anni di lotta per fà capisce a ferita cullettiva ch’ellu raprisenta ssu drama tremendu pè a Corsica, è aldilà di a Corsica. 18 morti, 2357 feriti, di quì, d’altrò, un mondu mediàticu prufundamente marcatu (parechji ghjurnalisti ch’èranu in cima à a famosa tribuna sò stati vìttime), u mondu di u ghjocu à pallò, a sucietà corsa in un cummossu stremu… a Corsica hà campatu ssi 30 anni cù e cullate di frebba ch’ella hà pruvucatu a catastrofa à ogni tappa ch’omu s’hè datu per pruvà di sòrtenne. L’incumpreensione è u traumatìsimu di e prime settimane, l’intarri, affucanti di dulori, e manifestazioni di còllera, u sìntimu d’abandonnu, i prucessi è e so inghjustizie, u disprezzu di l’autorità di u ghjocu à pallò francese, e gioie di i scontri chì si ghjucàvanu un 5 di maghju, è torna e manifestazioni, e petizioni, e riunioni, e cunferenze di stampa, i zitelli di quelli spariti, ghjunti omi è donne, à ripiglià u fiatu di a cuntestazione… Ci hè vulsutu 29 anni è deputati naziunalisti à l’Assemblea naziunale in Parigi, per ghjunghje infine à fà ricunnosce u drama, micca corsu, ma naziunale è internaziunale ch’ella raprisenta ssa catastrofa di u 5 di maghju. Oghje, a data hè sacralizata. Infine ! Un scontru prufessiunale di ghjocu à pallò in Francia ùn pò imaginassi ghjucassi un 5 di maghju. A data hè cunsacrata à u ricordu, ma micca per addisperassi, à u cuntrariu, per pònesi e quistioni di ciò ch’ellu deve esse u sport, è u futbollu in particulare. Per fà sapè à e ghjòvane generazioni ciò ch’ella pò campà una sucietà quand’ella si scorda di l’essenziale, a sulidarità, a spartera, u scàmbiu, l’interessu cullettivu.
Quist’annu, per quellu anniversariu di a catastrofa, u Cullettivu di e vìttime appronta une poche di manifestazioni per ghjust’à puntu permette à ugnunu d’entre ind’è ssa riflessione cumuna nant’à e càuse è e circustanze di a catastrofa. Mostre (liceu Simon Vinciguerra, paese di Cervioni), filmu « 5 mai 1992 » à u Spaziu Carlu Rocchi in Biguglia u 3 di maghju (8ore30 di sera), scontri amicali di a ghjuventù o di l’anziani ghjucatori di l’èpica u 4 di maghju, ricordu di pettu à u munimentu in Furiani, u 5 di maghju (4 ore), messa nustrale à a Catedrale Santa Maria (6 ore), testimugnanze di vìttime u 6 di maghju à u Teatru di Bastia (8 ore 30 di sera) cunferenza u 7 di maghju « Du traumatisme de Furiani à la mémoire collective aujourd’hui » (10 ore 30 nant’à u Vechju Portu) di Richard Rechtman, antrupologu, psichiatru è di Joseph Agostini, psicologu clinizianu. Mostre di videò à u Centru culturale una Volta (8 ore 30 di sera).
Bastia, a Corsica, s’arricòrdanu è pròvanu à francà u drama cù a riflessione è l’educazione di i più ghjòvani. Mà u disprezzu ci hè sempre, per disgrazia, à i più alti livelli. A Federazione aurupea di u ghjocu a pallò ùn hà presu in contu a legge d’ottobre 2021 resa in umaggiu à e vìttime. Malgratu u mondu di u ghjocu à pallò chì si ramenta è rispetta mondu altre catastrofa, malgratu i 364 ghjorni di l’annata per sceglie di ghjucà una mezafinale di cuppa aurupea, l’UEFA hà sceltu u 5 di maghju pè u scontru ritornu di l’Olìmpicu di Marseglia contr’à i neerlendesi di Feyenord Rotterdam…
Eppuru… ci era u pòpulu corsu sanu davant’à a so televisone u 5 di maghju 1992. Èranu 18.000 spettatori in Furiani è 9.000 nant’à a tribuna maladetta, più di 5.000 sò cascate… millaie di feriti, decine fèrmanu per mai marturiati, è 18 sò stelle turchine in u cielu di e nostre memorie. •
