L’8 di dicembre hè statu sceltu da l’antenati da ch’ellu sìa Festa di a Nazione corsa ! Di ghjennaghju 1735 una Cunsulta à u cunventu Sant’Antone di Casabianca, cunsacreghja a Vèrgine Maria Regina di a Corsica, u so cantu u Diu vi Salvi Regina diventa l’innu naziunale è a festa di l’Immacculata Cuncezzione, l’8 di dicembre, Festa di a Nazione. Fochi pupulari sò incesi in tutti i paesi, sònnanu e campane, risònanu mughji è canti d’allegrìa, a Corsica festa a so liberazione !
289 anni dopu, Corsi s’impègnanu in Lìsula, in Conca, Portivechju, Corti, Bastia, Siscu… è parechji altri appuntamenti dati nant’à i retali suciali. Messe nustrale, prucessioni, granìtule, cunferenze, serate di canti, spassighjate, accumpàgnanu impaghjellate è bandere… Participate à ss’appuntamenti nustrali è fraterni !
Da ramentà dinù, chì stu ghjornu di l’8 di dicembre hè statu sceltu per esse a prima paruzione di u nostru settimanale Arritti chì festighjerà i so 57 anni ! Evviva ! •
