Torna duie donne assassinate da u so cumpagnu di vita. Sò 92 dapoi u principiu di l’annata. È sò 108 i feminicidii in generale pè u 2022 in Francia. In l’Ìsula di a Reunione, una mamma di famiglia di 3 cinini hè stata pugnulata da u so cumpagnu di vita u 6 di nuvembre. Avìa 49 anni. In Brittagna, ghjè Florence, 38 anni, ch’hè stata tomba cù e so cinine da u so maritu. A so salma è quelle di e duie zitelle di 8 è 11 anni, sò state truvate in casa u 30 d’ottobre in Carantec. Stu feminicidiu, è ssu dopiu infanticidiu, sò stati qualificati da i media di « drama familiale ». Ma ùn s’agisce micca d’un fattarellu. È forse di pensà ch’ella hè un « drama » più chè un assassiniu, hè una manera di « scusà » u gestu. In fatti, ssa corcia donna è e so duie figliole sò state tombe perch’è u maritu ùn suppurtava micca chì a so moglie ripiglii a so libertà è possi campà senza ellu. Pigliatu di rimorsu s’hè impiccatu dopu à avè avvilinatu tutta a so famiglia. Ancu u cane hè statu tombu. U so addisperu si serà nutritu di ghjelusìa è d’umiliazione per vìa di a so manera di vede a so moglie : cum’è a so prupietà. Ùn serà ssa manera di vede a donna in a sucietà chì impeghjurisce u prublema è face chì una donna more tutti i trè ghjorni in Francia ? A sucietà, a so pulizza, a so ghjustizia, cuntinuèghjanu à pruvà di « capisce », è dunque di scusà. Ssu drama ferma un assassiniu. E donne chì ponu lagnanza ùn sò micca abbastanza messe in securità per vìa di sta visione « adulcita » di e viulenze cunghjugale. I ghjùdici pròvanu à appacià nanzu di sanziunà. I cinini fèrmanu sottu à a rispunsabilità di u babbu, ancu quand’elli sò stati viulenti cù elli dinù. Face chì a mamma ferma d’una manera o l’altra sempre in cuntattu cù u so boiu. Nanzu di vede sè l’omu pò curassi o nò, ci vole à mette in securità e donne minacciate. Ssa priurità ùn esiste micca. È face chì, cum’è pè u casu di a corcia Julie Douib*, e lagnanze ùn sò pigliate à u sèriu. È u peghju accade.
153 donne sò state tombe in 2019 da u so cumpagnu di vita, 102 in u 2020, 122 in u 2021, è sò già 92 in 2022. Malgratu e pulìtiche è i Grenelle di e viulenze contr’à e donne, ùn ci hè nunda à fà da ch’ellu calessi stu contu mòrbidu. Hè impeghjuritu da altre statìstiche chì tòccanu a donna perchè hè donna. Una donna nant’à sei scopre a sessualità cù un raportu furzatu. Frà quesse, 36 % anu stu raportu furzatu nanzu à i so 15 anni. 53 % di e donne in Francia sò state vìttime di fastidiu o di viulenza sessuale omancu una volta in a so vita. Più di a metà ! Frà quesse, 91 % cunnòscenu u so agressore. Vale à dì, un babbu, un fratellu, un cucinu, un amicu, un cullegu di travagliu, u patrone… partenarii di vita. 94.000 donne sò viulentate ogni annu. 213.000 sò vìttime di viulenze fìsica o sessuale da u so cumpagnu di vita o anzianu cumpagnu di vita.
È cumu puderìanu esse trattatu à paru e donne, quand’elle tòccanu 28,5 % di menu chì l’omi à u travagliu ? E viulenze ùn sò solu fìsiche, ma dinù murale è ecunòmiche.
A donna sott’à a dipendenza d’un omu, ùn ghjunghje à chitalu, ancu s’ella subisce viulenze. Sta vuluntà di vulè supranala hè a prima di e viulenze. Per pudè regulà u prublema di e viulenze contr’à e donne, ci tocca à scambià u sguardu di a sucietà nant’à a donna. •
Fabiana Giovannini.
* assassinata in Calvi in 2019.
