Cari amichi lettori, aghju fattu una gattiva cascatoghja è mi sò fratturatu duie lumbare.
Ci hè vulsutu passà à u bloccu d’uperazione è n’aghju per qualchi ghjornu d’uspitalisazione…
A squadra di reddazzione assicurerà a paruzione, ùn vi ne fate.
Hè quandu v’accade un accidente cusì ch’omu piglia veramente cuscenza di u prufessiunalìsimu, a gentilezza è a devuzione di i persunali di a salute. D’un colpu vi sentite vulneràbile è sminuita, rebia di dulori, cumplettamente dipendente di l’altri, è scuntrate ghjente furmidèvule, attenziunosi è umani. Da i spendifochi chì vi pìglianu in càrica cù maiestrìa allora chè vo site impittata è in pezzi, à i servizii d’urgenze malgratu l’attesa per vìa di u nùmaru d’intervenzioni, u serviziu in càmera, divoti è attenziunati, quelli di notte cum’è quelli di ghjornu, rispundendu à tutte e vostre chjame, u serviziu di a sala d’uperazione, carcu à tenerezza è penseri pè a vostra pena è a vostra inchietùdine… sò tutti stati magnìfichi è a furmidèvule catena umana di i succorsi hè bella chè in piazza. Aghju pussutu benefizià di a più bella tecnuligìa riparatrice cù un operazione di cimentuplastìa è l’aiutu d’un scanner ùnicu in Corsica (ùn ci n’hè chè sei in Francia). U nostru uspedale pò esse ancu in cima di u prugressu quand’omu stà à sente i persunali medicali chì sanu i bisogni di l’ìsula ! Ss’urdignu ghjove assai, è ancu di più d’istatina cù i turisti accidentati, mà ùn ci sò chè 20 letti permessi in u serviziu di neurochirurgìa in Corsica malgratu una pupulazione multiplicata per quattru o cinque l’estate, è ancu di più !… Di vede dinù i persunali di reanimazione in greva, hè un scàndalu pulìticu.
A salute deve esse una priurità ind’è e nostre sucetà, moltu più in ssi tempi di pandemìa.Vogliu quì ringrazià à tutti chì m’anu accumpagnata in ssi mumenti penìbuli, datu fiatu è forza da pudè suppurtà u dulore tremendu (è ùn sò micca qualchisia di frizzulu !). Aghju truvatu u curagiu di fà fronte nu i surisi, i sguardi è a buntà di sta ghjente d’uspidale chì face un mistieru di vucazione.
L’avemu visti è ancu sciaccamanati per sta pandemìa chì ci avveleneghja dapoi più d’un annu è mezu avà, ci ne scurdemu un pocu troppu suvente ind’i nostri paesi duve esiste un serviziu pùblicu, ma daretu à u so duvere è u so mistieru, ci sò donne è omi chì pòrghjenu l’umanità à u cutidianu è v’aiùtanu a francà e difficultà. Sciaccamanate torna a elli ! A si merìtanu tutti i ghjorni.
Tanti ringrazii dinù à i parenti è l’amichi chì sò stati a fiancu a mè. Stò megliu. Curate a vostra salute, hè un bè preziosu.
À prestu, cari lettori ! •
