Doris avìa 48 anni è era mamma d’un zitellu di 14 anni. Lampata da a so finestra da u so anzianu cumpagnu di vita, s’hè morta in i bracci di i succorsi in Colmar. Certi vicini l’anu vista scumbatte cù ellu qualchi minuta nanzu d’esse lampata da l’ottèsimu pianu, nimu ùn hà pussutu intervene. U so anzianu cumpagnu era statu puru cundannatu pè e so viulenze è li era difesu d’entre in cuntattu incù ella. E lege ùn bàstanu à impedisce d’altri drami. Cumu sòrtesi di ssa malamorte ?
L’omu avìa 2,5 grammi d’alcolu in u so sangue è dopu à a so malfatta, hè statu à a finestra fighjendu a salma, lampènduli e cannette di biera ch’ellu avìa betu… Era statu cundannatu in 2019 à sei mesi di prigiò attempati per avè minatu a corcia Doris. Era seguitatu da u serviziu d’inserzione è di prubazione di u ghjùdice d’appiecazione di e pene.
Doris hè a 49a vittima di e viulenze fatte à e donne in 2021. Annu, sò state 94 à more sott’à calci è pugni, cultellate o fucilate. Malgratu parechje lagnanze, ùn ghjùnghjenu à truvassi in securità. Sse statìstiche tremende palèsanu u nùmaru ancu di più tremendu di l’agressioni. È l’agressori si tròvanu forse troppu lìberi per rivene à circà a so vindetta. Ùn bàstanu e misure d’alluntananza. U 25 d’aprile scorsu, l’omu avìa già francatu l’interdizzione d’avvicinassi di a so vìttima. Ma ùn hè micca statu rimessu in prigiò. Puru, di lugliu 2020 avìa già bramatu ss’interdizzione è era statu chjosu 2 mesi di più in prigiò. Doris era dèbbule è vulneràbile. Ùn ghjunghjìa à resiste à ssa rilazione tòssica. Avìa bisognu d’un aiutu più impurtante, più seguitatu, più fermu. Invece, l’omu ch`ùn ghjunghjìa à curassi da l’alculìsimu, è dunque d’una viulenza strema, ch’avìa già bramatu l’interdizzione d’avvicinassi, era lacatu in libertà, senza surveglianza. Cum’hè pussìbule ? Puru, certe suluzioni esìstenu. Di più fermezza. Di menu libertà. Appartamenti sott’à cuntrollu, braccialetti eletrònichi, cure furzate pè i culpèvuli, ch’ellu sìa per scumbatte l’alculìsimu, a droga o sta viulenza ch`ùn ghjùnghjenu à cuntrullà… Ci vole di più messa in securità è cunsiglii à e vìttime. U prublema ùn puderà rinculà chè sè a sucietà decide di fanne una priurità sucietale. Perch’è ghjè un fragellu sucietale.
Di maghju scorsu, in Merignac, una mamma di famiglia di 3 cinini s’hè morta brusgiata viva. Avìa 31 anni. Esciutu di prigiò pè avè la minata, hè ghjuntu quantunque à truvà la lampènduli una fucilata in e gambe da ch’ella ùn fughji, è l’hà brusgiata viva, senza rimorsu nè vergogna. L’omu era cunnisciutu pè a so viulenza strema. È a so vìttima avìa postu parechje lagnanze. Era stata gravamente ferita. Quì torna ci era una misura d’alluntananza ch’ùn hà ghjuvatu à nunda. Micca braccialetti, micca surveglianza d’un omu viulente esciutu di prigiò allora ch’omu pudìa teme vindetta.
Ssi drami accàdenu allora ch’ellu s’apre u prucessu di l’assassiniu di Julie in Calvi in 2019. Avìa postu parechje lagnanze Julie, ma ùn hè stata prutetta da a sucietà. A sapìa, è avìa dettu : « mi piglieranu à u sèriu quandu saraghju morta ».
Ci vole Ghjustizia per Julie, ma dinù pè e pròssime vìttime. •
