Scrittu « Grande situ di Patrimoniu », classificatu frà i più belli di a costa ueste di Capicorsu, spaziu rimarchèvule è zona N, dunque micca custruttìbile, pista d’accessu nant’à un spaziu stratègicu agricole, àrburi sradicati, nant’à a famosa banda di i 100 metri liturali, tòmbulu di rena scempiatu per creà una piaghja artificiale è mètteci stallazioni balneare, parasoli transat, è strutture di risturazione sott’à l’insegna « Bos’ »… eccu u fragellu ambientale ch’hè statu fattu in Ferrìngule, sopra à a piaghja di Catarelli ! U tuttu, ben intesa, senza permessu di custruisce ! « Stu risturante accatasteghja tutti l’interdetti » dice l’associu U Levante ! Appena infurmatu di e prime infrazzioni, l’associu hà scrittu, di nuvembre 2017, pò di maghju 2018, à u prefettu di u Cismonte. A Direzzione Dipartimentale di i Territorii è di u Mare (DDTM), serviziu di u Statu, hà verbalizatu i rispunsèvuli indilicati, è parechji abitenti di Ferrìngule si sò lagnati anch’elli à pressu à u merre. Ùn ci hè statu nunda à fà. A sucietà hà cuntinuatu à stallassi, pò à apre, infine à rege un risturante è un bar, accunciendu in più un spaziu di rena di pettu à u stabilimentu da pudè gode di l’ambiente magnìficu di ssi lochi per urganizà serate è feste ! U Levante, torna, solu veru difensore di l’ambiente in Corsica cù altri associi, hà purtatu lagnanza à u Precuratore di a Repùblica. Vistu chì st’impiastrata era dinù offesa à u Padduc, U Levante hà interpellatu a Cullettività di Corsica, da ch’ella si porti partita civile anch’ella. « Sarebbe un segnu forte per tutte e sucietà fora’di lege chì cuntinuèghjanu à sacchighjà di manera illegale u liturale per tiranne un benefiziu privatu » avìa dettu tandu U Levante. Dinù, l’associu chjamava i merri cuncernati da piglià arrestati d’interruzzione di i travaglii ogni volta ch’ella si pruduce un affare sìmule à nant’à u so territoriu, è, ben intesa, li dumandava di piantà di dà permessi di custruisce ind’è e zone incustruttìbile. Per disgrazia, Ferrìngule hè una cumuna cunnisciuta pè e so infrazzioni à e règule di l’urbanìsimu. Basta à lampà un oghju nant’à ssa gestione disastrose è i permessi illegali dati ; atttaccati regularmente da l’associu. Cum’hè pussìbule di permette un scèmpiu sìmule ?? Cum’hè pussìbule d’aspettà sempre citatini, aduniti à u senu d’un associu cum’è U Levante, per dà di pettu à st’infrazzioni ? Cum’hè chì i puteri pùblichi ùn sìanu micca di più attenti, è di più attivi da per elli ind’è ssa lotta contr’à l’offese fate à u nostru ambiente ? Fin’tantu ch’elli lascieranu fà cose sìmule, ùn si puderà micca parlà nè di sviluppu durèvule, nè di Padduc, nè di difesa di l’ambiente. Hè un veru stumacheghju, di chè addisperassi di i puteri pùblichi è dubbità di a so vuluntà di fassi rispettà. Di chè scurragisce a ghjente unesta, è incuragisce i gattivi sughjetti, chì si ne rìdenu di e lege è di e decisioni pulìtiche. Ssu disprezzu di a demucrazìa hè un perìculu pè a sucietà. Ùn ci vole micca dopu à stunassi di vèdela svià di male in peghju. Menu e règule sò rispettate, più e derive s’ingattivìscenu, più si cunfòrtanu quelli chì ne càmpanu. È e derive, tandu, ponu purtà luntanu… Più sò rispettate è appiecate e règule, menu sò pussìbule e derive, più si cunforta a ghjente unesta è più si rinforza a demucrazìa. •
