« Si ricunnosce u gradu di civilisazione d’un pòpulu à a so manera di trattà l’animali » dicìa Gandhi.
A lege contr’à a maltrattanza animale hè stata aduprata in Francia !
Malgratu a pressione di i lobbì di u cìrculu, di l’animalarie, di i pilliccie, di i delfinariomi, parechji misure impurtante sò ormai scritte ind’è a lege.
– l’allevi di visoni saranu chjosi sùbitu à a prumulgazione di a lege.
– l’animali salvàtichi sò ormai interdetti in i cìrculi. Ancu s’elli annu 7 anni per mèttesi in règula cù a lege, ssa decisione hè impurtante è qualificata di « stòrica » da l’associi di prutezzione di l’animali chì l’aspettàvanu dapoi un pezzu.
– i delfini è l’orche ùn puderanu più esse tenuti in cattività. Custì torna, ci hè un tempu di 5 anni per mèttesi in règula cù a lege, ma i parchi aquàtichi ùn anu più drittu di prupone spetàculi cù cetacei chjosi in e piscine. Hè u casu di Marineland induv’ellu ci hè statu parechje morte d’animali. Hè creatu dinù un Cunsigliu di benestà di i cetacei è ùn si puderà più mette in spetàculu l’animali salvàtichi in e feste private, e discotteche o à a televisiò.
– i cani è i gatti ùn puderanu più esse vinduti in animalarie à pàrtesi di 2024, fora di siti agreati. Ùn si puderanu più cumprà nant’à internet per via di tutti i tràffichi ch’ellu ci hè. Un certificatu « d’ingagiamentu è di cunniscenza » hè creatu per rispunsabilizà i prupietarii d’animali, per ramintà l’ublicazioni ch’elli anu ver di u so animale. Dinù pè i prupietarii di cavallu o sumeru è e cundanne per l’abandonnu di l’animali sò aumentate.
Un educazione à l’èttica animale hè intrudutta ind’i prugrammi di scola è integratu à u serviziu naziunale universale.
A maltrattanza di l’animali dumèstici hè sanziunata. Tumbà un animale pò diventà un delittu allora ch’ellu era solu una cuntravenzione sinamente avà.
A lege si riferma dinù di pettu à zoofilìa è a zoopurnugrafìa nant’à l’animali, cù cundanne chì ponu andà sin’à trè anni di prigiò.
Disgraziosamente, ùn ci hè statu avvanzate per prutege u bestiame pè a cunsummazione alimentaria, malgratu i scàndali di maltrattanza custatati. Ùn ci hè micca decisione dinù per prutege a fauna salvàtica contr’à e pràtiche di caccia. Ma sse prime avvanzate sò impurtantìssime di pettu à a putenza di i lobbì scumbattuti.
Hè dunque una vittoria per tutti l’associi chì rivendichèghjanu dapoi anni è anni. Hè una vittoria umana dinù per via di una grande parte di a pupulazione chì si mubilizeghja nant’à e rete suciale, in e petizioni è in sustegnu à tutti st’associi. •
