Yvan, ti dumandu pardonu. Arritti hà pruvatu à fà sapè è dinunzià l’inghjustizie chì ti minàvanu, avemu cù i toi chersu ghjustizia è verità à longu à a to fughjita, cummentatu i trè prucessi, dinunziatu e bugìe, e manipulazioni, e barbuzerìe, l’inchieste urientate, u non rispettu di a presunzione di nucenza à i più alti livelli di u Statu, a non presa in contu di i puntelli di a to difesa, a culpabilità statuita nanzu à i prucessi, a non ricunniscenza di u solu testimognu di i fatti, puru amicu ìntimu di u prefettu assassinatu, ch’hà dettu ch’ùn eri tù l’assassiniu, u ricusu di a ricustituzione durante anni è quand’ella hè stata decisa infine, troppu tardi per impone a verità è scumbatte e cunvinzioni stallate. Tutti i fatti è puntelli accertati chì ti permettìanu di fatti sente, sò stati affucati, rilativizati, nigati, messi da cantu. Puru, malgratu trè prucessi è tutti i mecanìsimi di Statu scatinati, u so òdiu è a so voglia di rivìncita, ùn sò ghjunti à pruvà a to culpabilità. L’anu solu decisa. Puntu è basta. T’anu cundannatu, micca solu à a perpetuità. T’anu cacciatu u più preziosu di a to vita, a libertà, e to muntagne, e to capre, i toi. Mà ùn bastava micca. T’anu cundannatu à a morte. Ghjuntu à 20 anni d’incarcerazione, a paura di vèdeti forse rivendicà u drittu à vultàtine in casa toia, li era insuppurtèvule. Ti dumandu pardonu perch’è ùn simu ghjunti à strappà ghjustizia. Avemu fiascatu nu a to difesa. Avemu scumbattutu torna rivendichendu u to avvicinamentu è i to dritti i più elementarii. Avemu manifestatu, animatu cumitati di sustegnu, contrastatu è cunvintu mondu a ghjente, in carrughju, à traversu l’iniziative di l’eletti, franchendu ancu u Mediterràniu è e lìmite di a Corsica o di u campu naziunalistu, sin’à u parlamentu naziunale, ciò chè no dicìamu dapoi anni hè statu ripresu da altri parlementarii, da a dritta à a manca. Mà ùn hè micca statu abbastanza. Ùn simu ghjunti à cacciati da ssu martòriu. Sti 20 anni di càrcere sò state longhe è dulurose ma ùn hai fattu sente a to amarezza. A to andatura hè firmata quella d’un omu arrittu, sèriu, degnu. Chì disgrazia pè i to boi ch’ùn pudìanu dimustrà u perìculu chè tu raprisentava secondu à elli ! Scrivìa à quelli chì ti scrivìanu è rispundii sempre d’una ziffra « cù un murale d’acciaghju »… Ti fecii ancu qualchì risata, mittendu cù parentesi un (hi hi hi) quandu ci vulìa ride ! Chì forza di caràtteru ! Chì tippettu ! Forse hè què ch’elli ùn anu micca suppurtatu. À longu à l’anni, a rivendicazione per l’avvicinamentu hè cresciuta. Per tè è per Petru Alessandri è Alinu Ferrandi. U drittu, solu u drittu. Ma ancu quì hè firmatu chjosu u guvernu. Dapoi u 2017 Petru è Alinu sò liberèvuli, ma fèrmanu in priggiò, è nant’à u cuntinente. Tù, scumbatti nant’à un lettu d’uspidale. È a còllera di a ghjuventù ùn si pò più parà. Teni forte o Yvan, a Corscia sana brama chè tù ti disceti. Sì forte. Serà a to rivìncita. Ti mandemu forza è fiatu è simu di core cù tè. •
