À traversu ssu lamentu di u nostru fiume nustrale, hè u pòpulu corsu chì parla è s’indirizza à Parigi chì ci affanna da sèculi… bellìssima puesìa di Ghjuvan’Tèramu Rocchi, messa in cantu da Felì in u so discu E Nove.
Monte Cintu mi dà è friscura è purezza
Falgu salti saltendu da teppa à cutalone
Sò u fiume sò Golu di fole è di passione
Ma pocu à tè ti preme o Senna à tè fiumone
Trà sciappali è strittoni sboccu in la scala santa
Quassù l’altagna in volu quaiò a pescia lesta
Ci si colla in Niolu à pregà o fà festa
Ma pocu à tè ti preme o Senna a mo gesta
I mo ponti in un tempu Ponte Altu è Ponte Novu
Purtàvanu i passi di i mo figliuloni
I toi ci sò ghjunti cun fucili è cannoni
Ma pocu à tè ti preme sò ne portu u dolu
E meie e fiumare sbàrsanu u so lagnu
In una foce turchina mare Mediterraniu
Ci si pesa u sole cum’è à u primu ghjornu
Ma pocu à tè ti preme o Senna u mo sonniu
U mo sonniu hè di corre da Monte Cintu à mare
Cantendu a canzone di chì m’hà fattu fiume
S ’ellu ci hè un dumane di pace à mezu e scume
Parlà ne inseme o Senna, parlà ne fiume à fiume.
Parlà ne inseme o Senna, parlà ne fiume à fiume. •