A guerra hè sempre stata brutta. Ùn ghjova nunda à lagnassi di i mèttodi gattivi impiecati, hè a guerra, è tutti i mezi sò boni à disprezzà è addebbulisce u nemicu. Frà e mullizzerìe ch’elli ponu fà l’omi trà d’elli, a guerra in Ucràina hà mustratu quantu l’Umanità s’hè inventatu un mezu di destruzzione massiva cù u nucleariu. Era statu inventatu cume mezu cusì dettu di « dissuasione », di chè fà abbastanza paura per ùn purtà l’altru à attaccavi lite… invece nò, bellu cuntrariu, hè mezu putenziale di destruzzione definitiva. O quasi. U nucleariu ùn hè più solu dissuasione, cù a guerra in Ucràina, hè diventatu un arma, un mezu di pressione effettivu chì pò esse impiecatu senza vergogna. S’hè vistu prima cù a centrale di Cernobile, o ciò chì ne ferma di perìculu tamantu cù u so sarcofagu bellu scaghjulu ch’hà custatu milliardi è ch’hè sempre à minaccià l’Umanità. I Rùssii si ne sò ghjuvatu cum’è scudu per ammansà e so truppe è pudè lampà i so missile nant’à l’ucrainani senza ch’elli pòssinu risponde, cù u rìsicu di tuccà u sarcofagu… L’affare hà duratu qualchi settimana eppò i Rùssii si sò avvisti ch’elli mettìanu in perìculu i so suldati cù e pòlvere radiuattive à l’intornu di a centrale ciambuttata sopralocu da i passi è veni di i so camioni militari… Parechji suldati sò cascati malati. È tandu, si ne sò andati i Rùssii… Cù a centrala di Zaporijia, a più grande d’Auropa cù i so sei riattori, si sò perfezziunati… ghjuvèndusine cum’è arma è cum’è rischiglia ecunòmica, è pocu imprema s’elli pìglianu u rìsicu di fracicà i sistemi di cuntrollu è di securità di a centrala ! A Francia è l’altre nazioni nuclearie ci anu fattu crede sinamente à avà chì u nucleariu civile ùn avìa nunda à chì vede cù u nucleariu militare è ch’ellu ùn ci era nunda di più sicuru…. Si vede oghje ch’ellu ùn hè vera cù a battaglia per cuntrullà a centrala è a minaccia ch’ella raprisenta per l’Auropa sana. I prottoccoli di securità è e cunvenzione internaziunale sò belle è bone… in tempu di guerra ùn vàlenu tant’affare. Hè un fattu, l’indùstria nuclearia hè un perìculu per l’Umanità, in tempu di pace, cum’è tecnulugìa ch’hà e so debbulezze, è in tempu di guerra cume strumentu di pressione è rìsicu maiò. A presenza di centrale nuclearie nant’à i campi di guerra pò cambià u risultatu d’un cunflittu. Dapoi u principiu di sta guerra, l’Auropa è l’Otan s’impedìscenu d’intervene di più per vìa di sta minaccia nuclearia. È oghje chì l’Ucràinani ripìglianu un pocu di fiatu, chì ferà un Poutine addebbulitu è inghjuliatu ? Cù Cernobile, s’hè vistu u perìculu tamantu di un sbagliu umanu. Cù Fukushima, s’hè vistu u perìculu tamantu di e cunsequenze d’una catastrofa naturale. In Ucraina si vede u perìculu tamantu di un usu militare di stallazioni nuclearie civile. Tandu, persiste à vulè custruisce centrale nove per regulà a crisa energètica mundiale, cuntinuà di multiplicà i reattori civili per dà di pettu à a crisa climàtica, hè un incuscenza è un irrispunsabilità di pettu à tamanti rìsichi pè a pianetta ! •