Ci mancava… ci hà rigalatu duie seratone in Biguglia. U vultà di Felì nant’à a scena u 7 è l’8 d’ottobre scorsu, hè statu una magìa !
U spetàculu aprìa a stagione di u Spaziu Culturale Carlu Rocchi. « Face sempre qualcosa di principià una stagione nova, sopratuttu cù un artistu tamantu, un amicu, un militente culturale, cunnisciutu, ricunnisciutu da tutti, difenditore di a so lingua, a so cultura, omu di trasmissione impegnatu ind’è a pedagugìa ma sempre cù semplicità, modestìa, chì si sà ingirà di musicanti di prima trinca è di talente » hà dettu per prisentalu, u direttore di u Spaziu Alinu Gherardi. Ùn si pudìa dì di più ! A voce sempre più putenta, a passione sempre più viva è generosa, a presenza calurosa nant’à a scena, d’amicizia scumpartuta, Felì ci hà messu tutti l’ingredienti di una bellìssima serata chì nimu ùn vulìa vede finisce ! U pùblicu allegru è incantatu hà sciaccamantu à più pudè è partecipatu cusì à u Live chì s’arregistrava à longu à sse duie serate di ritruvate nant’à a scena pè u cantatore casinchese. Ssu Live serà dispunìbule di dicembre è n’avemu già a brama. U spetàculu era pienu di surprese, da a presentazione umorìstica cù Elisabeth Volpei Parigi et Marilyne Pietrucci Girard d’Isulatine, à a videò clip di stu ghjuvanottu (capillutu !) d’una vintina d’anni in u 1989, chì s’affirmava già è mughjava a so voglia di « Campà »… Era a stonda nustalgìa di stu spetàculu… magnìficu ! U secretu di l’artistu, u cunniscimu, si chjama Ghjuvan’Teramu Rocchi, u pueta madurnale chì li hà amparatu tuttu, datu tuttu, cum’ellu si piace à ramintà Felì ricunniscente d’un amore figliale, chì saluta una cullaburazione di 32 anni, un travagliu cumunu accanitu ind’un ambiente affettivu è un leame mai spentu. Felì li hà resu un umagiu magnìficu cù una cumpusizione soia, parule è mùsica À Ghjuvan’Teramu Rocchi. Un mumentu forte d’emuzione è di ricordi cari passati cù ss’umone di a nostra cultura, smaritu troppu prestu, qualchi annu fà.
Accumpagnatu da u so figliolu Stèfanu Travaglini, à a ghitara è à u cantu, Felì hè à capu à una squadra di musicanti furmidèvuli tutti, da l’indispensèvule Nicolas Zimako à a bassa è à l’accunciamenti, à u talentuosu pianista Pierre Agostinetti, u magnìficu trumpettista, Renaud Gensanne, e percussioni di Pirro Barrios è a batterìa di Dimitri Pinet, a ghitara è i cori cù Jimmy Ronchi, i cori dunnini torna di Laura Degiovanni, u viulinu cù Elena Moncho Danelian, l’arpa di Nelly Orsini… È à u sonu è i lumi Pierre Angeli, Thibault Ficcara è El Makki Arioui. Speremu ùn scurdacci di nimu, chì sò una quindecina à travaglià in a squadra di Felì, senza sminticassi di Maria Lucia Tramoni, sustegnu fidu di tant’anni è di tutta a famiglia Travaglini à fiancu à ellu dapoi i so primi passi nant’à a scena. Ste duie serate èranu un mumentone per tutti è tutti anu trasmessu cù Felì intusiàsimu è gioia di a ritruvata !
Assai emuzioni dunque per st’appuntamentu è un piacè tamantu di spàrtele cù u pùblicu. Felì hà fattu u pienu di u Spaziu e duie sere, è s’ellu n’avìa cummandata un antra, empiìa torna ! Più d’una vintina di canti rigalati chì ci anu fattu viaghjà à l’arritrosu di e nostre vite per duie ore di spetàculu, cù canti scelti da u so pùblicu stessu, ch’ellu avìa cunsultatu capunanzu, è canzone nove dinù. Hè esciutu un single di sittembre scorsu Una sera in paese scrittu da Patrick Croce è di mùsica cumposta da Stèfanu Travaglini, induve tutt’ognunu attaccatu à u so paese si pò ricunnosce. Altru cantu novu, Amparàtemi à cantà cumpostu da Felì ch’hà da esce di nuvembre.
Tutti i messagi ci èranu, i prigiuneri, e neguziazioni cù u Statu è e nostre brame d’avvene, da ch’ellu spunti qualcosa di grande, di bellu, di stòricu pè a Corsica, eiu ci credu hà dettu Felì ! A lotta contr’à a droga, e brame di a ghjuventù, è l’amore ben intesu ch’accompagna tutti i so canti, pè a so lingua, pè u so paese, pè a ghjente. Da dacci fiatu è forza per dà di pettu à l’avvene. Tanti ringrazii o Felì per sti mumenti cari rigalati. Da ritruvacci prestu si spera ! •
F.G.
