Avemu francatu di ferraghju un annu di guerra in Ucràinia. Sò 400.000 morti, più chì a pupulazione corsa… a metà sò suldati russii, l’altra metà Ucrainiani, suldati è decine di millaie di civili tumbati in i bumbardamenti… 75.000 solu in Mariupol, cità martoriu… Sò decine di millaie dinù di crìmine di guerra, assassinii, donne è zitelli viulentati, zitelli arrubati à i so parenti, cità arruinate, ecunumìa à paghjolu… Ci tocca à ùn scurdassi u martoriu di ssu pòpulu in cor’di l’Auropa. Imàginàtevi cheti ind’è a vostra vita, à scialavvi trà a casa, u travagliu è a surtita cù l’amichi… è da colpu, schiàtanu bombe dapertuttu, case è casali strutti, vitture in pòlvera, tufoni nant’à e strade di e cità è e strette di i paesi, elettricità tagliata, acqua scarsa, vicini è parenti spariti, bastimenti ufficiali in focu, tuttu u vostru universu si sfonda, è sta sirena chì ribomba di ghjornu è di notte… Certi anu campatu mesi sani in i curridoghji di u metrò, o in e càrciere senza finestra… Cù 400.000 morti, si stima à u doppiu i feriti. A maiò parte struppiati pè a vita. È sò millioni di dispiazzati. Arritti in principiu di sta guerra, interrugava Natalya, duttore in Aiacciu ch’hà fundatu l’associu Solidarité Corse-Ukraine. Ci hà cuntatu u s’amore pè u so paese, e so assumiglianze cù a Corsica, a so cultura festiva, e lee cù a natura, i paisagii di muntagna, e spartere. Cù u so maritu, Ànghjulu Santoni, è l’aiutu di i s’amichi duttori, frà i quali u duttore François Pernin, di u Cullettivu di Lotta contr’à e Sclusioni (CLE), s’hè impegnata da porghje un pocu di sustegnu à quelli chì càmpanu sta guerra. Face digià u quindecèsimu invìu di medicine, materiale medicale è robba da tutte e mamme ch’ùn si tròvanu più in Ucràinia. Sti passi è veni dumàndanu un impegnu maiò, per racoglie a robba, traspurtala franchendu ind’è a so vittura a metà di l’Auropa per ghjunghje sin’à l’uspidali aiutati. L’associu Solidarité Corse-Ukraine aiuta dinù a ghjente spatriati. Sò millioni d’esiliati per fughje a guerra, spapersi in Auropa. A maiò parte sò mamme cù i figlioli, i babbi sò firmati à cumbatte. Ci hè vulsutu truvali un alloghju, scole pè i zitelli, travagliu per campà, imparali a lingua, permèteli di pudè andà à vede i soi firmati in Ucràinia. Ci hè dinù l’aiutu di l’associu Pè a Pace chì face anch’ellu i viaghji culandi cù materiale è robba da tutte e mamme. Un antru cunvogliu umanitariu parterà stu mese d’aprile. Sò mondu l’imprese dinù ch’anu messu manu in pasta. È manu in stacca ! Sta sulidarità magnìfica cummove Natalya. « Scumbattu pè a libertà è l’identità. Per avè a scelta. Sò valori chì u mo babbu è u mo babbone m’anu trasmessu è chì ci unìscenu cù u pòpulu corsu » dice a presidente di Solidarité Corse-Ukraine. « Ma ùn pudìa fà nunda senza u mo maritu, u duttore Pernin, è senza i membri di l’associu. U so sustegnu hè statu cuntìnuu ». A guerra ùn hè ancu à finì disgraziosamente. A dìcenu tutti l’osservatori, hà da durà. Ùn ci vole micca à stancassi è cuntinuà di porghje sustegnu. Amichi lettori, Arritti a vi dumanda, sustenite Natalya, sustenite u pòpulu ucrainianu, sustenite Solidarité Corse Ukraine. I vostri soldi aiuteranu à cumprà e medicine ch’omu aspetta qualà ind’è l’uspidali tracarchi di feriti. Evviva l’Ucràinia. Slava Ukraini ! •
Fabiana Giovannini
Chèque à Solidarité Corse-Ukraine, Lotissement l’oliveraie, Trova, 20167 Alata
Virement sur le compte : IBAN – FR76 1027 8091 0800 0202 8030 140 / BIC – CMCI FR 2A
