Scola in Festa festighjerà a so annata sculare stu sàbatu primu di lugliu in I Fulelli. Un bell’appuntamentu chì testimunieghja di a dinàmica di l’associu è di i talenti ch’ellu cuntribuisce à fà nasce, spannendu a nostra lingua è a nostra cultura. Tante sciaccamanate à u capi d’urchestra di tuttu stu travaglione, u cantatore Felì, à i membri di l’associu chì u fàcenu campà, à l’insignanti, à l’alevi, è à i partenarii, per sta magnìfica rièscita !
Nata in 2001 da a vuluntà di trè giòvani chì sò andati à circà à Felì (Dumè Bordas, Natale Emmanuelli è Ghjuvan’Ghjàcumu Emmanuelli) Scola in Festa sumineghja dapoi 22 anni !
Oghje l’associu conta 350 elevi, occupa a mediateca di I Fulelli, è sparghje cultura, ballu, mùsica è cantu in tuttu rughjone è aldilà. Scola in Festa hè un arnese culturale impurtante nant’à u quale s’appòghjanu e cullettività, a cumuna di Penta di Casinca, a Cumunità di e cumune Castagniccia Casinca, è dinù a Cullettività di Corsica dapoi u 2012.
L’associu hà una cunvenzione torna cu u Cunservatoriu Henri Tomasi è u cullegiu di Fulelli. Ne prufìttanu l’elevi di u cullegiu pè e discipline di ballu clàssicu è di mùsica da a sesta sin’à a terza, trè ore è mezu à settimana chì li permèttenu di prisentassi à l’esami in fin’di ciclu.
« Scola in festa mette in risaltu a lingua corsa in ogni disciplina è attività pruposta, in particulare in l’insignamentu musicale » spieca Felì, « a lingua hè puntellu di sviluppu culturale cù u ciclu di scuperta musicale bislingua prupostu à i zitellucci sin’à 7 anni. S’ampara à leghje è à scrive a mùsica. I giòvani da 6 à 14 anni ponu raghjunghje u gruppu di cantu. Sò scumpartuti in attelli adatti à a so età. U cantu in lingua corsa hè fundamentale ».
U travagliu ch’hè statu fattu dapoi tutte st’annate cunterà tutta a so vita, per ssi zitelli ch’impàranu à tempu à esse omi è donne di stu paese di Corsica !
L’attelli sò varii, ballu clàssicu è mudernu, chitarra, pianò, viulinu, batterìa è percussioni, flautu è pìvana, svegliu musicale, cantu, cullettivu è individuale, teatru pè i zitelli è pè i maiò… anu un successu tremendu, cum’è Puppeppu, a mascotta di l’associu ! È u travagliu ùn si pianta quì ! Scola in Festa urganizeghja ogni annu un cuncorsu di cantu pè i zitelli. Quist’annu s’appronta pè u 22 di lugliu è si pò sempre scrìvesi.
Felì è Puppeppu anu fattu torna cantà i zitelli arregistrendu un superbiu clip nant’à a pieve d’Orezza, in partenariatu cù l’Acqua d’Orezza, è in gràzia à a puesìa magnìfica di Ghjàcumu Fusina (da vede nant’à pàgina Facebook di a scola).
Scola in Festa si tramuta dinù in e pievi è paesi di Corsica, da fà cantà i zitelli. Cusì in Calacuccia, hè andatu à fà cantà una trentina di pìcculi niulinchi. U Niolu induve l’associu s’hè piantatu dapoi 2 anni suminendu aldilà di a Casinca.
« Scola in Festa hè diventata un polu culturale di prima trinca pè a Casinca, a Costa Verde, a Castagniccia, a Marana è aldilà. L’impegnu infranasitu di i so attori nè face a so ricchezza » dice torna u situ di l’associu.
Allora, ùn mancate micca sàbatu a so festa per vede tuttu ciò ch’elli anu travagliatu quist’annu l’elevi ! À pàrtesi di 7 ore di sera à a Mediateca di I Fulelli, ci serà da beie è da manghjà, mùsica, cantu è allegria ! Evviva ! •
F.G.
https://www.scolainfesta.corsica
“Amparàtemi à cantà”
Felì ci hà rigalatu dinù un novu dischettu « Amparàtemi à cantà » cù 22 canti scelti da u so pùblicu è arregistratu in live durante una serata à u Spaziu Carlu Rocchi in Biguglia. U purterà sin’à in Cuntinente per un giru di cantu chì si cumpierà di nuvembre 2024 à u Casino de Paris ! A vi dicìamu, Felì ùn pianta mai ! Pudete truvà u dischettu in streaming è nant’à tutte e piattaforme. Ne riveneremu à parlà ! •
