A grande guerra hè stata un fragellu pè u mondu è pè a Corsica. Si parla di 12.000 suldati morti per l’ìsula nant’à 50.000 mubilizati à u fronte di battaglie tremende, 20.000 à 25.000 sò stati feriti è certi struppiati pè a vita ! Senza cuntà i morti di malatìa ind’è l’infernu di e trancee o i fucilati inghjusti, « per l’esempiu ». I Corsi sò stati i più mubilizati cù e corcie pupulazioni di e culunìe, sin’à i babbi di famiglie numarose è babbi è figlioli à tempu… Famiglie sane sò state annientate.
A seconda guerra mundiale, solu vint’anni dopu, hè stata un scumpientu anch’ella è i Corsi, torna, anu pacatu un prezzu tremendu. 13.000 sò stati mubilizati in u 1944. A Corsica hè in zona lìbera sin’à u 1942. L’11 di nuvembre, e truppe taliane sbàrcanu ind’è l’ìsula. 85.000 suldati taliani cù 15.000 suldati alemani, vale à dì un armata di 100.000 omi pè una pupulazione di 200.000 abitanti ! Ma malgrata sta putente armata d’occupazione, a resistenza corsa s’urganizeghja. Arme è munizioni ghjùnghjenu cù u sottumarinu Casabianca. L’azzioni contr’à l’occupanti si multiplichèghjanu, u curagiu di i Corsi si face sente. Più d’un Corsu nant’à 20 hè resistente. 12.000 anu da bàttesi in 43 pè a liberazione di u so paese. Quasi tutta a pupulazione attiva s’omu tene contu di donne, vechji è zitelli. Ùn hè stunente di vede a Corsica primu territoriu liberatu. A pupulazione si volta contr’à l’allemani, ma frà i taliani dinù, certi attàccanu l’allemani, d’altri li vènenu in appoghju. A cunfusione hè tutale. In Aiacciu, sbàrcanu più di 6000 militari francesi di u Generale Giraud ghjunti d’Alger. Da u 9 di sittembre à u 4 d’ottobre 1943, e battaglie sò sanguinose per liberà l’ìsula. Patriotti corsi, militari francesi ghjunti d’Alger, taliani vultati in u campu francese, è gumieri maruccani affròntanu l’alemani chì cèrcanu à raghjunghje u portu di Bastia per fughje versu l’Italia. Aiacciu hè liberatu u 9 di sittembre, Bastia u 4 d’ottobre. A liberazione di a Corsica s’hè fatta in un mese è sò morti pè a liberazione di l’ìsula più di 2200 personi. 172 patriotti corsi, 200 vìttime di i bumbardamenti frà i quali, 170 in Bastia solu, 87 militari francesi ghjunti à aiutà a resistenza corsa, 137 vìttime in u turpigliamentu di u battellu, u Général Bonaparte di a cumpagnìa Fraissinet u 19 di maghju. Sò morti dinù una millaia d’alemani è 637 taliani. S’aghjùstanu quasi una millaia di feriti trà corsi (più di 600) è francesi, in più di i 600 taliani è i 500 alemani.
Dopu à a liberazione, a Corsica diventa un « portaviò » per l’alleati, una basa impurtante detta USS Corsica, ch’hà da cuntà assai per l’uperazioni in Italia è u sbarcamentu in Provenzia d’aostu 1944. Ottu mesi dopu, u Calvados hè liberatu, u primu battaglione francese entrutu in Caen hè battizatu Fred Scamaroni. Tenìa u retale resistente Action R2 Corse, à a dumanda di u Generale De Gaulle. Ma, arrestatu in Bastia da a pulizza taliana, torturatu, si tomba per ùn piglià u rìsicu di parlà u 19 di marzu 1943. Ùn hà pussutu vede a liberazione di a Corsica à a quale hà tantu travagliatu.
80 anni dopu, ammentèmuci i sacrifizii di tutti st’omi, donne è zitelli morti in guerra.
80 anni dopu, u mondu ùn hà ritenutu e lezziò di l’atrocità di a guerra. Da l’Ucràinia à l’Armenìa, a Palestina, Israele, u Sudanu, l’Etiopìa… in parechji lochi di u mondu, omi, donne, zitelli mòrenu sempre sott’à a barbarìa. •