Si parla di 15.000 morti in u cunflittu trà Israela è Palestina (13.500 Palestiniani, più di 1300 israeliani). In Ucràinia, si ne parla menu dapoi u 7 d’ottobre, ma si conta circa 300.000 morti omancu. Più di 200.000 Rùssii, più di 100.000 ucrainiani… À u Sudan (un paese cinque volta più grande chè a Francia, à u Sud di l’Egipta), una guerra civila trà dui generali hà già fattu 50.000 morti è 6 millioni d’esiliati, 500.000 dapoi u principiu di l’annata. Decine di millaie di zitelli pàtenu a fame. Culandi dinù i massacri è a barbarìa sò tremendi. Nimu ùn ne parla… Ind’è l’Artzakh, o Nagorno Karabakh, paesucciu cristianu d’urìgine armeniana incastratu in core di l’Azerbaidjanu, paese musulmanu, hà fattu anch’ellu millaie di morti è tutta a pupulazione hè stata ubligata di parte in esiliu in Armenìa. Armenìa oghje minacciata da l’Azerbaidjanu anch’ella… À u Yemen, à u sud di l’Arabì Saudita, a guerra civile hà fattu 300.000 morti secondu à l’ONU è centinaie di millaie di personi spiazzati torna. Più di 80 % di a pupulazione campa sott’à u livellu di puvertà. Culandi, cum’è cù u Hamas, l’Iranu (induve mòrenu centinaie di donne, omi è zitelli oppressati da u regime di i Mollah), ci entre per qualcosa. Guerra torna in Sumalìa (600.000 morti dapoi u 1988, 13.000 zitelli solu per l’annata 2021), in Etiopìa (600.000 dapoi u 2020), in Birmanìa, à u Malì, u Niger, u Burkina Fasò, u Nigeria, a Sirìa, dapertuttu, ùn ci hè chè guerra è straziera. I morti viulenti sò cresciuti di 97 % solu per l’annata 2022, cù una crèscita di 400 % dapoi u principiu di l’annate 2000. I zitelli sò e prime vìttime di sti cunflitti. Secondu à l’Unicef, 400 millioni di zitelli suffrìanu di a guerra in 2022 è più di 43 millioni sò stati ubligati di parte di u so paese. Sta statìstica hà duppiatu in deci anni. « Hè u contu u più altu mai arregistratu dapoi a seconda guerra mundiale » dice l’Urganisazione di e Nazioni Unite. È cù a guerra trà u Hamas è Israela, ssu contu hà da cresce torna di manera macabra. In Gazà, secondu à l’Unicef è un stùdiu di l’ONU, si stima à 700.000 u nùmaru di zitelli spiazzati versu u sud. 150.000 donne sò incinta frà e quale più di 6000 duverìanu apparturisce da quì à trè settimane. Parte israeliana dinù, a situazione di i zitelli ùn hè accettèvule. Sò trenta zitelli ustagi di u Hamas, frà i quali ciucci, dinunzia torna l’Unicef : « nunda ùn pò ghjustificà di tumbà, mutilà, o arrubà zitelli israeliani nucenti, è ùn hè accettèvule di ghjustificà assassini di zitelli cum’è sèmplice dannu cullaterale » dice l’Unicef. Dapoi u 2006, l’ONU hà identificatu più di 33.000 viulazione grave di u drittu di u zitellu in sta parte di u mondu, sapendu bè ch’ellu ci n’hè di più ! « 2022 è 2023 sò state annate diffìciule » dice torna l’Unicef, « 2023 serà un annata nera. E cunsequenze di u Covid è di a guerra in Ucràinia hà messu millioni di personi sott’à u livellu di puvertà. I disastri climàtichi è i cunflitti armati tòccanu assai i zitelli. 45 millioni di zitelli di menu di 5 anni pàtenu a fame. 45 millioni torna sò spiazzati cù 58 millioni di personi maiò. U mondu soffre d’un mancu di vuluntà pulìtica è di parità in a distribuzione di e richezze » dice torna l’associu. Corci zitelli. Corcia zitellina marturiata. È ùn si parla quì di ciò chè vo leghjerete in pàgina 6 è 7 di stu settimanale… •