Natu in 2009, l’associu Inseme, presidatu da Laetizia Cucchi, hè ricunnisciutu d’utilità pùblica da un Decretu di lugliu 2019. Sustene e personi chì dèvenu andà nant’à u Cuntinente per curassi. A Corsica hè sola regione francese à ùn avè Centru uspidalieru universitariu (CHU), màncanu specialità chì cundùcenu a ghjente à spatriassi per curassi. « Sti flussi sanitarii sò dinù fùghjite chì crèanu difficultà materiale è finanziarie pè i malati è e so famiglie » spieca l’associu. A spiccanza di u mare, u percentuale impurtante di malati custrinti à spatriassi, pèsanu assai nant’à i bisogni di salute. Ogni annu, a CPAM conta 26.000 viaghji nant’à u Cuntinente per càusa medicale. Ogni famiglia hè stata tocca da u prublema omancu una volta. « A specificità sanitaria di a Corsica custitueghja un tràmpalu ecunòmicu generalizatu è permanente di l’accessu à i curamenti. Hè una doppia pena inaccetèvule chì vene in più di a malatìa » dice torna Inseme.
Inseme hà custruitu una risposta à sse difficultà. Hè una piattaforma d’infurmazione è di sulidarità ch’assicureghja trè missioni : infurmazione, sulidarità, è raprisentazione. Hà apertu dui scagni per accumpagnà i malati, in Aiacciu è in Bastia. Esìstenu dinù parechje antenne lucale cù benevulenti in u Centru di Corsica è in u Suttanacciu. Cusì, sustene a ghjente in e so dimarchje amministrative, l’aiuta à circà alloghju nant’à u Cuntinente, hè una lea trà partenarii assuciativi è stituziunali, anima banchi d’infurmazioni ind’è e manifestazioni urganizate in Corsica o nant’à u Cuntinente, tene permanenze settimanale d’infurmazioni in e cumune, mette in rilazioni benevulenti, face l’avvanza di certe spese rimbursèvule, pè u trasportu per un dettu, sustene dinù di manera finanziaria e famiglie custrinte à parte senza pussibilità di fassi rimbursà, porghje torna un sustegnu ghjurìdicu.
E famiglie sò un sustegnu impurtante pè i malati. Cù l’aiutu di a Cullettività di Corsica è di dunatori, Inseme hà cumpratu trè appartamenti in Nizza è in Marseglia per offre nuttate à i parenti di ciucci uspitalizati chì l’Assicuranza Malatìa ùn rimborsa micca.
Inseme hè partenariu cù l’Agenzia Regiunale di a Salute, a Cullettività di Corsica è parechji urganìsimi. Hè cusì membre di i Cunsigli Territuriali di Salute, di l’Udaf, di u Cesec di Corsica, di a CPAM, di u CRSA… Porghje riflessioni nant’à a pulìtica regiunale di a salute è face pruposte pè i diritti di a ghjente. Benevulenti, salariati, partenarii, fòrmanu una squadra attiva chì face un travaglione per aiutà a ghjente malata è e so famiglie, suvente ciucci cù parenti custrinti à parte per curali. Un impegnu umanistu è generosu. Inseme conta assai pè u prò di a ghjente in Corsica. •
Cuntatti : 04 95 20 22 61 / info@inseme.org
Urgenze : 0800 007 894 (nùmaru verde, chjama gràtisi)
Infurmazioni : Inseme.org