Si chjamava Marie-Dominique Versini. Avìa 35 anni. Un melanomu a s’hà purtata lachendu i soi ind’una tristezza infinita.
In 2007, l’associu La Marie Do hè creatu per unurà a so memoria da i so culleghi di travagliu à Air Corsica, cù l’impegnu di l’impresa. U scopu hè di luttà contr’à u càncaru, porghje sustegnu à i malati è à e so famiglie, dalli fiatu è forza in a so lotta pè a vita.
« Sò parechje millaie ogni annu à rinfurzà i ranghi di u Commandò di La Marie Do, dice a so presidente, Catherine Riera, sò muratori di u core, ugnunu porghje a so petra à a custruzzione d’un rampale chì sunniemu assai altu è sodu contr’à u càncaru ! »
Ogni annu, una chjama à prugettu regiunale hè lanciata per sustene i prugetti i più pronti à a presa in càrica di i malati. Frà quelli aiutati st’ùltim’anni : corsi di gimnàstica dopu à u càncaru cù l’associ Récré 2A è Gym Volontaire de Calvi ; acquistu di materiale pè a policlinica di Furiani pè i càncari in ginecologìa è in urologìa ; renuvazione di càmere d’accolta pè i malati è e so famiglie per l’associu « un toit pour mes parents » in Marseglia ; accunciamentu di l’estensione di « La maison du bonheur » in Nizza chì offre oramai 12 càmere à i malati è a e so famiglie ; accunciamentu di a terrazza è l’accolta di u novu centru di radioterapìa di l’uspidale di Castellucciu ; acquistu di materiale pè u centru contr’à u dulore di l’uspidale d’Aiacciu è di Sartè, per l’uspidali Eugénie è Castellucciu in Aiacciu, è per l’uspidale di Corti ; prestazioni d’una sociu estetiziana è d’una psicologa pè i malati uspitalizati in Castellucciu ; finanziamentu nant’à trè anni di u prugramma internaziunale di ricerca di l’IPC cunduttu da u prufessore Bertucci è da u Duttore Collery nant’à i càncari di u pettu à u stadu metastaticu.
L’associu aiuta dinù à a presa in càrica di i biglietti d’aviò per l’accumpagnatori di i malati, è ancu per certi viaghji di malati. Benestà, cunfortu, ascolta, presenza… l’associu agisce direttamente nant’à e repercussioni fìsiche, mentale è emuziunale di i malati.
La Marie Do hè 100 % benevulente. Adunisce ghjente da tutte e mamme, mondu assuciativu, imprese, insignanti, persunali medicali, studienti, ritirati. « A cuntribuzione d’ugnunu hè preziosa » dice Catherine Riera.
Un cunsigliu d’amministrazione di 30 membri, un scagnu, una cummissione pè e chjame à prugetti, riflèttenu à l’azzioni è e mèttenu in ballu. Ci hè dinù un Cumitatu d’urganisazione ch’appronta e ghjurnate di a Marie Do ogni annu d’ottobre cù mostre, animazioni, dibàttiti, cuncerti, scumesse spurtive. Face 16 anni ch’elle sò urganizate !
In più di u scagnu in Aiacciu, l’associu hà un antenna in Corti, una in Balagna, un antra in Portivechju è una in Bastia. Ugnuna hà a so pàgina Facebook.
Patrick Fiori è Jennifer sò cumpare è cummare di l’associu. « Sò fieru di porghje a mo partecipazione, dice Patrick Fiori. Sta malatìa tocca assai ghjente è ùn accade micca ch’à l’altri. Simu tutti cunfruntati ind’è a vita à stu male, ch’ellu sìa ind’è a nostra famiglia, pè i nostri o per noi stessi. Vulemu fà passà un messagiu di sulidarità, di fraiutu è di speranza ».
Voi dinù sustenite a Marie Do ! •
Infurmazione è cunttati : www.association-la-marie-do.com