L’Éveil hè un Adapei, vale à dì un associu dipartimentale di parenti è amichi di personi cù prublemi mentali. L’Adapei in Francia rilèvanu di a Fundazione Unapei chì sustene a ghjente cunfruntati à prublemi mentali. Hè u primu retale francese d’associ di difesa di l’interessi di e personi ch’anu ssu gèneru di disturbi.
U retale l’accumpagna per truvà alloghju, sbrugliassi ind’è a vita, rèndeli autònomi u più pussìbule. Accumpagna dinù e famiglie, da ch’elle ùn sìanu micca soli di pettu à e difficultà. È accumpagna i stabilimenti è servizii ch’accòglienu sti giòvani ch’ùn ponu sbrugliassi da per elli. U primu stabilimentu hè statu creatu in u 1948 da una manata di parenti in cerca di suluzioni pè i so figlioli. L’Adapei hè diventatu in 1963 un arnese di gestione di tutti i stabilimenti spezializati ch’accumpàgnanu sti zitelli sin’à a so magiurità. Sò à tempu centri medicali è educativi, ch’anu apertu dinù à pàrtesi di u 1974 centri d’aiutu cù u travagliu (CAT o ESAT) pè a presa in càrica di sti giòvani una volta diventati adulti. Dalli un statutu di travagliatore permètteli d’esse sucializati, d’avè drittu à a Securità Suciale, di truvà stima di sè.
L’Unapei adunisce 330 associ in Francia è conta 900.000 membri. Ci sò circa 45.000 famiglie seguitate è 80.000 salariati ind’è 3000 centri d’accolta o servizii d’accumpagnamentu medicosuciali.
L’Éveil hè l’Adapei di u Cismonte. Hè statu creatu in u 1964 in Bastia. Conta una centinaia di membri chì tròvanu cunfortu, cunsigli, ascolta è ponu regulà inseme i prublemi d’educazioni di i so figlioli, di prufessiunalisazione quand’elli fràncanu 20 anni, d’alloghju dinù. « L’Éveil hà per scopu d’accumpagnà tutte e tappe di a vita » dice a so presidente Véronique Cuvillier-Lugarini. L’associu conta cinque strutture in u rughjone bastiacciu chì s’occupa di 300 famiglie. L’istitutu medicu educativu accoglie i giòvani à pàrtesi di l’età di 3 anni. Sò presi in càrica di manera persunalizata, da dalli un educazione addattata à e so difficultà. L’IME pò accoglie sin’à 56 zitelli sin’à l’età di 25 anni da u luni à u vènari. Ci hè una scola cù insignanti spezializati, un internatu per una dodecina di zitelli, sfarente sezzioni per addattassi à i prublemi (autìsimu, poliandicap…) L’IME accumpagna dinù e famiglie, prupone attività per sviluppà a persunalità di u zitellu, migliurà a so cumunicazione è a so sucialisazione, appruntali à entre in u mondu di u travagliu. Ci hè dinù una surveglianza medicale. « L’IME hè una porta, a prima petra da pudè apre d’altre porte » spieca l’Éveil.
L’altre strutture sò centri d’accolta cù alloghju, centru di travagliu è attività vàrie ch’offrenu, curamenti, cultura, educazione, sport è vita suciale à i giòvani : A Sulana in Montesoru (30 personi à dorme, 6 ch’ùn vènenu chè u ghjornu) ; l’Esat di Bastia (centru di travagliu cù 140 benefiziarii di più di 20 anni), A Carlina (una trentina di personi accolte tutta l’annata per vìa di difficultà più grave).
Per l’Éveil, « ognuna di sse personi hè ùnica, è ogni ghjornu, quelli chì sò à u so latu, càmpanu mumenti strasurdinarii ! Un surisu, un prugressu, un passu in più versu l’autunumìa è l’inclusione vàlenu tutti i sforzi fatti ! » •
Infurmazione è cunttati : www.adapei-eveil.fr