Gilles Simeoni avìa marcatu a campagna di l’elezzioni territuriale di u 2015 cù u so discorsu à a giuventù, in Corti, à l’Università Pasquale Paoli, nìchjula di sta giuventù induve tutte è generazioni di naziunalisti, è aldilà tutte e generazioni di giòvani corsi, anu sparsu e so brame d’avvene. Nutriti da e sperienze di i so antenati, ci anu scupertu culandi a stòria landana, l’inghjustizie è i sacrifizii di i tempi foschi, i tràmpali messi à u sviluppu, u disprezzu, e ricchezze è e carte maestre di stu paese, ma dinù a gioia è a fiertà di spàrtele inseme, u cumbugliu di i dibàttiti è u brullichime di l’edee spartute, u piacè di campale in lingua corsa, eppò e seratone di canti, di discussioni torna à più pudè, di scaccanate, d’imbriaccate, d’amicizie sceme è di e prim’amurichjate… tuttu ciò chì forma à giuventù è face ch’ella campa à l’Università frà e so più belle annate, pronta à tutte e sfide.
L’Università ferma a più bella di e lotte vinte da a giuventù corsa. A nàscita di l’Università d’Estate in u 1973 è u cumbugliu di l’edee è di e vuluntà d’avvene nate à tempu, sò state frà e più belle scumesse di u pòpulu corsu è di a so giuventù induve puntàvanu digià e prime rivendicazioni pulìtiche. Ci era un intusiàsimu scemu, un bullore, una mossa ch’anu sparsu u spìritu d’un andatura cullettiva, a cuscenza d’esse un pòpulu è u duvere di tramandala. « Hè statu un mumentu impurtante di a nostra storia. S’hè diffusa a presa di cuscenza chì a vita culturale oghjinca s’era persa » dice ind’è a rivista Robba Ghjuvan’Ghjàcumu Albertini, unu di l’artisgiani di ste ghjurnate, interrugatu da Vannina Bernard-Leoni. « Per me, hè stata un’aghja induve chi tuttugnunu pudia vene à batte u so granu. Ha permessu à tuttugnunu di vene, è à tuttugnunu d’arricchisce si. »
50 anni dopu durante a campagna eletturale 2015, a giuventù ùn pudìa chè smaravigliassi di e brame d’avvene risintite. Hà campatu e so « Università d’estate ». È ùn era a sola, l’anziani militenti èranu in gioia cum’è ciucci, i Corsi chè no scuntrìamu a ci dicìanu, « cù voi omancu si sente a gioia quand’è vo affaccate ! » U militentìsimu deve esse spartera è allegrìa !
Puru, custruisce un paese ùn hè sèmplice. « Ci sò vittorie eletturale ch’ùn sbòccanu micca nant’à vittorie pulìtiche. Puliticamente, ùn avemu ancu vintu » dicìa Gilles Simeoni dui anni dopu, d’aostu 2017… Tamanta strada, è tamanta strada torna da fà ! « Ciò ch’hè davant’à noi, hè di custruisce un paese… Per custruisce un paese chì spessu dubbiteghja d’ellu stessu, ind’un cuntestu francese, aurupeu è internaziunale di crisa, ci vole mondu più chì un presidente di un Cunsigliu esecutivu. Mondu più chì un presidente di l’Assemblea di Corsica. Mondu più chì deputati è municipalità. Ci tocca à esse capaci d’avè donne è omi chì travàglianu in tutti i duminii » dicìa torna Gilles Simeoni. Eccu a sfida di a nostra
giuventù.
Èranu visiunarii l’omi di u 60… una generazione fora di norme ch’hà datu à a Corsica frà e so più belle mosse. E generazioni ghjunte dopu malgratu strazii è ancu sbaglii di pettu à un Statu pèssimu è viziosu, anu tenutu alta a bandera di a speranza. S’aspetta oghje a generazione chì saperà cuncretizà l’avvanzate, ripigliendu a sèguita di ssi 60 anni è più di lotta è di sacrifizii.
Truverà fiatu è forza sta giuventù ? Cù i valori, e lezziò di u passatu, è sopratuttu sta rabbia d’esse un pòpulu è di vulè custruisce u s’avvene di manera culletiva. •
