A venuta di u Papa hè stata un mumentu for’di u tempu. Si ne parla assai ind’è ssu nùmaru ma l’impurtanza di l’evenimentu a cummanda chì tocca à evuluzioni di a nostra sucetà isulana. Piantemuci un pocu nant’à ciò ch’ellu hà dettu u Papa. Quand’ellu parla, sò parulle pisate. Tuttu hè di sìmbulu in a parulla di a ghjesgia. A parulla di Ghjesù Cristu è di a bìbbia ella stessa hè di sìmbuli, di raprisentazioni, di metafori. U perchè di a venuta di u Papa in Corsica hà un sensu, i gesti chì sò fatti dinù, a parulla prununciata hè riflettuta apposta. Francescu hè venutu à dicci l’impurtanza di tènesi caru. In ssu mondu di cunflitti, di guerre, di misèrie, di tràffichi, d’abusi, di suffrenze, d’inghjustizie, tènesi caru, imprimurassi di u so vicinu, di i più dèbbuli, i zitelli, i vechji, i migranti, hè a chjave di a felicità è di un mondu più bellu. Hè ghjuntu à dumandaci di campà a fede purghjènduci a manu. Hà dettu quantu a cultura hè un vettore di trasmissione trà l’omi, parlendu di « a bellezza è l’impurtanza di a pietà pupulare » chì, arradicata in a cultura viva d’un pòpulu, permette à e personi ch’ùn pratichèghjanu micca di truvacci « ideali è valori ch’elli cunsiderèghjanu ùtile pè a so vita è pè a sucetà ».
« In a pietà pupulare, si pò capisce cumu a fede ricevuta s’hè incarnata in una cultura è cuntinueghja à tramandassi » hà dettu torna u Papa. Si capisce quì perchè l’uriginalità di a nostra cultura, di u nostru esse in tantu chè pòpulu, hà interessatu assai u Papa da fallu ghjunghje sin’à noi. In una terra induve a maiò parte di u pòpulu hè cattòlica cù una fede arradicata in a cultura è l’identità, u Papa ci hà dettu torna ch’ellu ci vole à fà attenti à ciò « chì a pietà pupulare ùn sia utilizata, strumentalizata da gruppi chì bràmanu di rinfurzà a so identità di manera pulèmica, alimentendu particularìsimi, upposizioni, attitùtine di sclusione ». Oghje ssu perìculu si risente di vede svìa a fede cattòlica. A strema dritta ùn hè mai citata in bocca di Francesu, ma omu capisce bè ch’ellu s’agisce quì di a primura di vede a crèscita di certi muvimenti chì si ghjòvenu di a fede per ghjustificà discorsi stremi, prufundamente cuntrarii à ciò ch’elli sò i precetti religiosi di u cattolicìsimu : l’amore di l’altru. Dice u Papa ch’ùn ci vole micca chì a pietà pupulare si scordi di Cristu. Dice chì a pietà pupulare ch’unisce « a fede cristiana è i valori culturali d’un pòpulu », alluntanata di i rìsichi identitarii indita « un impegnu è una testimugnanza per tutti à prò di a criscenza umana, u prugressu suciale è a prutezzione di tutta a creazione, sott’à u segnu di a carità ».
« A pietà pupulare, e prucessioni è e rugazioni, l’attività caritative di e cunfraterne, a preghera cumunitaria di u Santu Rusariu è d’altre forme di devuzione ponu nutrisce sta citatinanza custruttiva di i cristiani » hà dettu torna Papa Francescu.
Sse parulle mi pare sò da avvicinà da quelle, assai dure, ch’ellu avìa prununciatu contr’à i mafiosi. Avìa dettu tandu chì i mafiosi cuntinuendu ind’è sta vìa ùn èranu micca cristiani, è èranu ancu scumunicati. Parule forte. Dinù, ùn pò esse cristianu di praticà a religione cattòlica scurdèndusi di ciò chì fonda u sìntimu religiosu : l’amore.
Un discorsu assai pulìticu ind’è un mondu, una Francia, è ancu una Corsica sott’à a minaccia di u rinchjusu identitariu. Ch’ellu sìa intesu. •