Dapoi quasi 7 anni, i cullettivi anti màffia s’impègnanu da fà rinculà stu perìculu chì minaccia a demucrazìa è cù ella l’equilìbrii di a sucetà. Fà addimette l’esistenza d’una màffia in Corsica, sensibilizà a pupulazione da falli capisce i mecanìsimi è i guai ch’elli pòrghjenu i maffiosi, mette parulle nant’à e realità di sta malamorte, porghje un antru sguardu nant’à e vìttime, dinunzià e tulleranze, è ancu e cumplicità di certi, ch’ellu sìa ind’è l’imprese, e stituzioni, l’amministrazioni, i mercati pùblichi, l’alcolu, a droga, a prustituzione, u tràficu contr’à i migranti… È sopratuttu purtà u Statu è a Cullettività di Corsica à agisce per luttà contr’à a mampresa maffiosa, eccu l’azzioni di i cullettivi antimàffia in Corsica, chì gènanu, ci vole à dilla, accusati sottuvoce di disturbà i funziunamenti sin’à quì troppu bè stallati. À le volte disprezzati, è ancu dinunziati… ci hè vulsutu u tempu à i cullettivi per scuzzulà l’abitùtine, l’indiferenze, l’edee fatte. Hè statu un travaglione dapoi u 2019 per cunduce eletti è stituzioni à impegnassi, à ricunnosce e realità di sta prignenza, è à piglià in contu un sistema chì affoca a sucetà è u campà inseme. Ci hè vulsutu tempu, è disgraziosamente torna morti nucenti…
Oghje ssu travagliu hè ricunnisciutu, anu guadantu u rispettu ssi cullettivi è sò ghjunti à fassi sente cù e so dimustrazioni, i so dibàttiti, e testimugnanzi d’altre lotte antimàffie. In Parigi, a lege per luttà contr’à i mecanìsimi chì prutègenu a màffia, avanza cù a cuscenza di u pesu ch’ellu hà oghje u crìmine urganizatu in Francia. U narcotrafficu hè una calamità, certi quartieri ùn sò più accessìbuli mancu da a pulizza. L’abitanti sò abandunati à e mannate di sti criminali ch’ùn anu paura di nunda, chì tìranu senza fà casu di u passante, è ch’impònenu a so lege senza pietà. Parigi dunque s’hè svegliata infine aduprendu lege più dure, ancu s’elle dèvenu esse pèssime pè a salvezza di e libertà. Ci vole à attaccassi cù determinazione contr’à a putenza di u crìmine urganizatu è u so sìntimu d’impunità. U scopu hè di tuccà à u portaflogliu, è ùn hè sèmplice !
In Corsica dinù, ste règule nove anu da avè u so effettu. Omancu si spera. Ma ci vole di più. Perchè u pròpiu di i sistemi maffiosi hè di sapè addattassi è cuntene l’impattu di sse misure per ripiglià tranquilli u so cutiadianu di malfatte. Ci vole dunque à firmà vigilenti. Vene da st’imperativu a dumanda di creà una cummissione antimàffia. U 18 di ghjugnu, i cullettivi si sò intesi cù u presidente di u Cunsigliu esecutivu di Corsica per creà st’urganìsimu ch’hà per scopu di cunnosce megliu i mecanìsimi maffiosi, è dunque di pudè anticipà nant’à a so nocività. « Ghjè una cummissione ch’hà per scopu sopratuttu d’analizà u sistema maffiosu. Ùn hè mai stata fatta, ùn ci hè mancu statu travaglii universitarii nant’à stu fenòmenu, allora chì a Corsica ne soffre dapoi un pezzu. Ci vole à tènene contu quand’omu analizeghja l’ecunumìa di a Corsica, avè statìstiche, capisce megliu u prublema, di manera scientìfica » dice u portavoce di u cullettivu A Maffia Nò A vita Iè, Leo Battesti. I cullettivi bràmanu dinù chì sta cummissione possi cuntrullà i mercati pùblichi, fà pruposte da chì l’imprese dubbiose chì benefizièghjanu di u soldu pùblicu sìanu seguitate è cuttighjate, è perchè micca fà pruposte di misure regulamentàrie o legislative.
Di lugliu pròssimu, u presidente di l’Esecutivu prisenterà un raportu à l’Assemblea di Corsica pè a messa in ballu di ssa cummissione è di u so campu d’azzione. Hè una bona nova. •
Fabiana Giovannini.
