40.000. Sò e donne, omi è à le volte zitelli assassinati in i carrughji iraniani da a pulizza di i mollah… Più di 30.000 morti in dui ghjorni, l’8 è u 9 di ghjennaghju, dìcenu parechji mèdia. Stu sciffru tremendu hè quellu datu da i duttori di l’uspidali iraniani (30.304).
È màncanu à stu contu macabru, i morti ind’è l’uspidali militari, e salme trasferite direttamente in e morghe, o i morti direttamente sutterrati in fosse cumune senza mancu prevene e famiglie… Eppò, a ripressione ùn s’hè piantata à sti dui ghjorni… L’osservatori pènsanu chì ssu bilanciu sarebbe più vicinu à i 40.000 morti, forse di più. Ci hè vulsutu camiò rimorche per traspurtali, e salme sò ammansate in i carrughji in un spetàculu tremendu, i sacchi mortuarii sò stati cunsummati in un lampu, à le volte sò duie salme messe nentru…
330.000 à 360.000 personi… sò i feriti cuntabilizati in Iranu, frà e quale zitelli è donne incinta. L’uspidali màncanu di sangue, i duttori ùn sanu più cumu risponde à l’urgenze. È i guardiani di a rivuluzioni i perseguitèghjanu da ch’elli ùn cùranu micca i manifestanti.
I guardiani di a rivuluzione entrenu ancu ind’è l’uspidali per assassinà a ghjente nant’à u so lettu di suffrenza…
Centinaie di millaia di manifestanti in Mineapolis, Chicago è mondu altre cità di i Stati Uniti, dapoi l’assassinii di Renée Good è Alex Pretti in Mineapolis, dui americani tombi per èssesi opposti di manera pacìfica à a pulizza contr’à l’immigrazioni di l’ICE. Malgratu un freddu tremendu face ghjorni è ghjorni ch’elli manifestèghjanu l’americani contr’à sta pulizzaccia.
15 ghjorni. Hè ciò chì ferma à Cuba di riserva di petroliu pè i bisogni di a sucietà. chjusure cutidiane d’eletricità, filarate senza fine di vitture è sin’à 20 ori d’attesa pè avè duie goccie d’essenza,.. u blucchime di i Stati Uniti impedisce ancu à i paesi à l’intornu di furnisce l’ìsula in petroliu, minacciati di tassi, l’arma nova di Donald Trump per sbrembà tutti quelli chì li fàcenu resistenza aiutendu à Cuba…
32 personi sò morte in Gazà sta dumenicata, tumbati da un novu tiru israelianu. Frà i quali parechje donne è zitelli. Sò morte 509 personi sott’à e bombe israeliane dapoi u principiu di a tregua. 4 suldati israeliani anu persu dinù a vita, è 80 palestiniani sò stati tombi da u Hamas chì si ne piglia anch’ellu contr’à u pòpulu. Malgratu a tregua, si more sempre in Palestina. •
>>> Leghje dinù
