11 paesi di u golfu persicu, secondu à u presidente Zelensky, si sò vultati versu l’Ucràinia per chede aiutu di pettu à l’attache di i droni iraniani. Ghjunta specialista di i droni d’intercezzione, l’armata ucràiniana s’hè mustrata capace d’intercettà 80 % di i droni rùssii, sia piantènduli cù tiri di mitragliose, sia intercettènduli cù droni ch’ella sviluppa dapoi u 2024. L’Ucrainiani ponu dinù fà fronte à l’attache di missili. « L’Ucrainia hè pronta à prutege vite è à aiutà quelli chì sò pronti à aiutala » hà dettu Volodymyr Zelensky. Altru interessu di ssi droni, a so fabricazione costa pocu. L’usine ucrainiane furnìscenu 1.500 droni ogni ghjornu à l’armata. Hè cusì chì sperti ucrainiani sò stati mandati in u golfu è patti sò fatti cù l’Emirati.
1.029 morti è 2.876 feriti. Hè u bilanciu di a guarra israelolibanese palisatu stu 23 di marzu da u guvernu libanese. Frà ssi 1.029 morti, si còntanu 118 zitelli (372 feriti), 79 donne (424 ferite) è 832 omi (1.990 feriti).
Scondu à l’ONU, 1.049.000 libanesi sò stati custrinti d’abandunnà e so case, spiazzati in cundizioni tremende. « U nùmaru di spiazzati franca u millione è sò ghjente chì si sò arregistrate da per elle, vale à dì pensemu chì ssu nùmaru hè bellu di più impurtante » dice l’ONU.
4000 chilòmetri. Hè a distanza di dui missili chì sò stati tirati da l’Iranu nant’à una basa militara americano inglese ind’è l’oceanu indianu. I missili ùn anu pussutu tuccà a basa, ma forse u scopu era solu di fà sapè chì i missili iraniani pudianu tuccà l’Auropa…
500 sò e donne in più à esse state candidate in Francia à l’elezzioni municipale 2026 per via di u scrutinu ch’hà cambiatu cù a parità ubligatoria per tutte e cumune. Saperemu da quì à pocu quantu sò state elette à a funzione di merre. Ma ci hè pocu furtuna ch’ella cambii. Sinamente à avà èranu 12 % in Corsica e donne merre di u so paese. Nanzu à stu scrutinu, èranu 17,5 % in Francia, cù 36,4 % d’aghjunte.
70 % o quasi, à u primu cum’è à u secondu giru… (69,40 % à u primu giru, 68,20 % à u secondu) : a Corsica ferma campeone di a partecipazione à l’elezzione municipale in Francia. Certe cumune cum’è in Sartè, anu vistu a partecipazione francà i 90 % ! A partecipazione era di 57,10 % in Francia à u primu giru, 57,47 % à u secondu. U livellu u più dèbule dapoi 50 anni, s’omu scarta l’epidemia di covid. •
