A rientrata hè campata cum’è una festa in a maiò parte di i nostri paesi, tutti sti zitelli ch’anu ripigliatu u caminu di a scola anu fattu e so corse cù mamma, cumpratu a so nova cartina cù i so eroi preferiti stampati, i libri, i quaterni, e mine di culori… pè i più chjuchi, una manera di rassicurali è dalli a voglia di scuperta di fronte à ss’evenimentu di a so pìccula vita induv’elli lasceranu pè a prima volta a so mammuccia ; pè i più grandi, hè l’uccasione di seguidà a moda è di fanfarunà cù l’amichi, impazienti di cunnosce a nova maestra è u calendariu di a settimana… Sò belli i nostri cinnini, ne simu fieri, vulemu u più bellu per elli, tesori di famiglia, raprisèntanu l’avvene, e speranze d’una famiglia è quella d’un paese.
A rientrata hè una tappa ind’è l’annata chì ci ammenta tuttu què !
In Corsica sò circa 46.000 i zitelli ch’anu ripigliatu a scola. Bramemu chì tuttu serà fatta da ch’elli pàrlinu u corsu…
Ma in certi paesi, ciucci è zitelli ùn feranu micca a so rientrata.
Omancu 21.000 zitelli sò morti in Gazà. È quantu torna ùn sò micca cuntabilizati, e so salme firmate sott’à e ruine ? Nant’à u millione chì ferma vivu, pocu è micca ponu andà à scola, è ancu, sottu tendone è senza mezi… è face trè anni ch’ella duri. Sò quasi 4.000 morti o feriti in Ucràinia secondu à l’ONU chì dice chì ssu bilanciu hè di sicuru sottuevaluatu anch’ellu. Più di 20.000 torna sò stati strappati à l’amori di i soi, arrubati è depurtati da i Rùssii chì i sottumèttenu à una russificazione ; ma custì torna u sciffru hè sottuevaluatu, è dapoi e dinunziazione di crìmine contr’à l’Umanità solu 1.800 frà elli anu pussutu vultà in Ucràinia… Ci hè dinù 3.500 zitelli morti in Mediterràniu per avè vulsutu sunnià à un antr’avvene chì quellu di a guerra o di a miseria di u so paese (leghje l’Accapu di a settimana scorsa). È torna 8 millioni di zitelli sudanesi privati di scola per via di a guerra tremenda chì mena ssu corciu pòpulu.
Eppò ci hè un paese induve e cinnine sò interdette di rientrata…
20 millioni di donne è di zitelle càmpanu sott’à lege è decreti ch’affòcanu i so dritti fundamentali in Afganistanu. Secondu à l’Unesco, sò più di 2,6 millioni e zitelle interdette di scola secundaria o di stùdii universitarii. Hè u solu paese in u mondu à interdisce a scola à e zitelle fora di u primariu. È ancu, a puvertà sminuisce dinù l’accessu à l’educazione di e zitelluccie in u primariu. Certi parenti sò custretti à vende e so fèmine chjuche chjuche da pudè dà a manghjà à u restu di a famiglia… Una situazione chì arruina a so salute mentale, è e minaccia di matrimoniu primaticciu, di spluttazione, di viulenze. Settori ecunòmichi sani cum’è quellu di a salute o di u suciale per un dettu s’impuvarìscenu anch’elli per via di ssa guerra fatta à e donne. Urganisazioni clandestine sò messe in ballu malgratu i rìsichi, pè cuntinuà à occupassi di a so salute, o per dalli un insignamentu. Case si trasfòrmanu in sala di classa da 5 à 10 elevi zitellette chì ci vanu à l’appiattu… ci sò dinù corsi secreti in lìnea da permette à sse zitelle di cuntinuà a scola. Ma a disgrazia è l’addisperu di tutte sse corcie fèmine hè d’una viulenza strema. Certe, si tòmbanu, o si làscianu more per via di ss’isulamentu insuppurtèvule. Hè un drama senza nome.
Forza è sustegnu à e donne afgane. •
