32 anni dopu à a catastrofa di Cernobile è u so puzzicosu nuvulu putentamente radiuattivu, cosa ci ferma ? Una bugia tamanta à u mondu, mai sanziunata, una vera guerra piatta, un perìculu ch’ùn puderà mai più spènghjesi…
Ci sò duie bombe cataclismiche chì sò in attesa in duie parte di l’Umanità. Cernobile è Fukushima.
U 26 d’aprile di u 1986, a più grande catastrofa nuclearia di a stòria accade, tucchendu 9 millioni di personi, fendu centinaie di morti ch`ùn sò ancu ricunnisciuti è cundannendu per sempre un spaziu tamantu nant’à un circòndulu di 30 chilòmetri… oghje apertu à vìsite di turisti !
Sò stati centinaie di personi ghjòvane, militari, spendifochi, tècnichi è operai da tutte e mamme, à travaglià durante mesi è annate sopralocu per pulisce u periculosu mulizzu. Frà elli, i cusì chjamati liquidatori, anu ricevutu dose di radiuattività incredìbule, per impedisce una catastrofa torna di più spaventèvule.
S’ùn ghjunghjìanu à affucà u focu nucleariu, ci sarebbe statu una splusione 100 volte di più putente chè e duie bombe d’Hiroshima è di Nagasaki raghjunte… vale à dì tutta l’Auropa sarebbe stata cundannata, senza più pussibilià di campaci durante sèculi. Ssu focu nucleariu ùn hè micca spentu. Ferma sempre in qualchi locu sottu à e tunnellate di piombu è di rena lampati sopra, cuperti dopu da un sarcufagu d’astracu… ricupertu anch’ellu da un antru sarcufagu per parà l’usure è e crepulature di u primu…
O ghjente, u nucleariu hè una calamità ch’acciuttuleghja a nostra tomba à tutti !
Fukushima anch’ellu hè una bomba ch’incuba…
U magmà nucleariu, cusì dettu corium, s’hè impantanatu sottu à u pavimentu di a centrale è nimu ùn sà sin’à induve si n’hè andatu. S’ellu scava di più da a so forza distrutrice, è ch’ellu vince stese d’acqua… da a reazzione fìsica pruvucata, ferà una splusione tamanta ch’ùn si sà à chì puntu tremendu.
Pòvera pianetta ! Soffre di tante è tante sciagure pruvucate da l’omi ! Circatori anu scupertu pocu fà in u golfu d’Oman, una « zona morta », induv’ellu ùn ci hè più ossigena, vale à dì, induv’ellu ùn ci hè più nisun vita… «A zona hè grande cum’è a Scozza è cuntinueghja à allargassi. L’oceanu s’assuffoca » dìcenu ssi scientìfichi di l’Università di East Anglia è di l’Università Sultan Qaboos d’Oman. Sse zone morte si fòrmanu trà 200 è 800 metri di prufundezza in u mare è sò ingattivite da u riscaldimentu climàticu è a pulluzione di l’omi. I disguasti di u riscaldimentu climàticu pruvucatu da a sopraspluttazione di e risorze di a pianetta, a sfurestazione, a pulluzione di l’aria è di l’acqua, u pocu di rispettu di a natura è a so biodiversità sò tremendi è s’impeghjurìscenu. Trà u nucleariu è e pulluzioni da tutte e mamme, a pianetta lampa chjame à u succorsu chì nimu ùn sente…
Aiutu !!
Fabiana Giovannini.
