Aquistione hè tremenda. A minacia tocca tutti i paesi. Sparìscenu l’ape. Salvàtiche o d’allevu, si sfòndanu e culunìe in càusa di a pulluzione, u riscaldimentu climàticu, e malatìe oghjinche, e spècie vàrie di calafroni, i pesticidii, i neonicotinoidi pè u più, ma sopratuttu l’indiferenza è u mancu di reazzioni di e nostre sucietà di pettu à tutti sti perìculi è à i lobby…
A calata di e pupulazioni d’ape hè principiata in l’annate 90 in Francia. In 20 anni, si sò sfundate da 20 à 30 % è a pruduzzione di mele hè calata di 50 %. L’ape pullinisèghjanu 80% di e piante è i fiori.
Secondu à i scientìfichi, u valore ecunòmicu di l’attività di l’insetti pullinisatori cum’è l’ape, i bufoni, e baravulelle, e mosche… raprisèntanu 153 milliardi d’àuri ogni annu !
U so peghju nemicu, sò i neonicotinoidi ch’attàccanu u so sistema nerbosu. Pèrdenu u sensu di l’urientazione, s’addebbulìscenu di pettu à tutte e malatìe è finìscenu per more.
I studii anu truvatu sin’à dece spècie di pesticidii ind’u polline di i bugni. Tòccanu dinù tutti l’invertebrati terrestri è acquatichi, impuzzichendu e piante, ma dinù a terra, l’aria, l’acqua… l’insette ùn anu più nisun agrottu è accatastèghjanu e cuntaminazioni.
Sò interdette i neonicotinoidi dapoi u 2016 in Francia ma l’effettu di a lege principia di sittembre 2018, è ci sò une poche di derugazioni ! Per disgrazia, ùn simu ancu pronti à dà un pocu di rifiatu à e nostre ape… Tutti l’anni si tènenu l’Assisi di a biodiversità, uni pochi di studii, di resuluzioni da tutte e mamme sò prese… eppuru, e decisioni ferme è definitive ùn sò ancu à vene ! A biodiversità di e piante hè dinù impurtantìssime chì l’insetti anu u bisognu d’un alimentazione varia… Ci vole à interdisce i pesticidii in ogni locu. L’ape ponu fà decine di chilòmetri.
I lobby chì dèvenu rinuncià à i neonicotinoidi, si pròvanu à d’altri prudutti chìmichi gattivi anch’elli. Basta ! « L’apa hè un bio-indicatore, una sintinella, un sìmbulu per l’inseme di a sucietà. S’ùn avemu più pullinisatori, l’ecusistema serà toccu di manera tremenda. Ci vole à piglià decisioni vere, ci vòlenu atti forti da prutege l’ape » dice l’ONG France Nature Environnement.
Fabiana Giovannini.
