A cullettività ùnica hà sette mesi… Ùn simu ancu à tempu à fà u bilanciu, ma u trambulamentu annunciatu da tutti i diciuloni ùn ci’hè statu. Ancu sè une poche di difficultà ci sò è ci seranu – hè quantunque di règula quand’omu passa da trè cullettività à una sola, cù un saltu à 4700 agenti è un bugettu di un milliardu è dui centu millioni d’auri ! Invece, l’agenti si sò messi à travaglià inseme cum’ella era prevista, è l’assemblea di Corsica hà ancu adupratu senza prublema, è à l’unanimità ssu 27 di lugliu, i raporti cuncernendu l’armunisazione di i statuti è di e règule di gestione di u tempu di travagliu, quelle di u regime d’indennità, è quelle di l’azzione suciale à favore di l’agenti. Vale à dì, e cose si mèttenu in ballu, di modu appaciatu, è di manera abbastanza in furia, malgratu a mansa di travagliu, di discussioni è di neguziazioni ch’ellu ci hè statu ! A Cullettività di Corsica hà nove cumpetenze vinte nant’à i dipartimenti. Ci hè vulsutu à riurganizà i servizii. Senza parlà di e brame chè n’avemu di pudè vince altre cumpetenze in u quadru di a riforma custituziunale.
Di sicuru, fèrmanu impazienze è incumpreensioni per vìa di a disurganisazione ch’ùn si pò parà in qualchi settimana. Hè nurmale, tutti i direttori ùn ponu esse numinati sùbitu per un dettu.
È fèrmanu una mansa di rispunsèvuli di e trè cullettività à i quali ci vole à dà affettazioni. E prucedure dèvenu esse rispettate, a ghjente deve avè a pussibilità di pone a so candidatura, è ci vole dunque u tempu di tuttu stu parapiglia è tene amministrativu.
Puru, à a rientrata, l’urganigramma definitivu serà cunnisciutu, tutti i capifili averanu u so serviziu è e so missioni, è u travagliu di l’agenti puderà riurganizassi cum’ellu si deve. À l’infora, u nostru pòpulu ùn si rende micca contu di tutti sti capatoghji è s’impazientèghja. Puru e cose avvànzanu. A Martinica quand’ella hà francatu u passu di a Cullettività ùnica, hà messu dui anni per mette in ballu u so urganigramma, per solu 3800 agenti ! A Corsica ne conta quasi un millaia di più è ci hè ghjunta in qualchi mese ! Vale à dì u travaglione ch’hè statu fattu da u presidente di l’Esecutivu è da u so Direttore Generale di i Servizii ! È ci tocca à dassi di rimenu torna chì a rientrata serà diffìciule per vìa d’uni pochi di cartulari caldi caldi… I prisenta ssu nùmaru d’Arritti, Padduc, trasportu marìttimu, lozzi… ùn màncanu l’urgenze !
Sse scumesse di a nostra maghjurità si fàcenu à tempu à a custruzzione diffìciule è ancu inciampulata d’un diàlogu cù un guvernu chjosu è disprezzante. Puru, l’uppurtunità d’una mudificazione custituziunale, vale à dì di pudè strappà un statutu d’autunumìa ùn si prisenta tutti i ghjorni. Ci vulìa dunque à pruvàssila. Ancu assai ch’avemu i nostri trè deputati per fà a lea di ssu travaglione.
A scumessa di a Cullettività ùnica hè presa à u sèriu è bè cundutta da a nostra maghjurità. Peccatu ch’ùn avemu l’appoghju di u partitu di guvernu sempre in panna. I militenti si sèntenu sclusi di ss’avventura magnìfica pè a quale anu luttatu dapoi 50 anni per certi. U solu rimpròveru ch’ellu si pò fà à a maghjurità hè quessu custì. Màncanu l’infurmazioni è e cuncertazioni pè u nostru pòpulu. U diàlogu ùn si deve fà solu cù u guvernu o l’eletti tradiziunali chì ci anu sempre scumbattutu. Deve esse dinù ingagiatu è spartutu cù i nostri militenti. Sò sustegnu da permètteci d’andà di più luntanu. Sò a nostra lea di prussimità cù u nostru pòpulu. Sò surgente d’edee è i nostri più fermi imbasciadori nant’à u terrenu. Riesce à mette in ballu un partitu senza cunfiscà a demucrazìa ferma a nostra più bisugnèvule scumessa.
Femu a Corsica, partitu di guvernu !
Fabiana Giovannini.